Wednesday, December 24, 2014

Skyrocket!


كلنا ندري ان الخمر ممنوع بالكويت من الستينات بعد سالفة شركة الحاج مكينزي و مطالبة اعضاء المجلس بالغاء الترخيص و منع التجارة و بل قانون بمعاقبة التاجر و المستهلك
كله حلو
لكن تدري شنو المشكلة؟ 
المنع خلى هالشي شحيح، و ندرة الشي تخليه غالي و لما تحطه ضمن دائرة الممنوع فانت تخليه بأعلى سلسلة المرغوب

أبسطها لك

تعرف فيلم The Godfather? 
ما تحبه؟ 
تعرف آل كاپوني؟ لا تقولي مو سامع فيه
يا محفوظ السلامة هذا آل كاپوني من الي استفادوا من استيراد الويسكي عن طريق التهريب من كندا خلال فترة المنع بأمريكا
تدري خلال فترة المنع الجرايم و العنف بل و استهلاك الكحوليات زاد رغم ارتفاع أسعارها؟
ما راح أقولك الخمر يحافظ على كيانك لأن الخمر مذهب للعقل وهو مفتاح كل الشرور على الانسان و غير هذا يخليك مصخرة .. شله كل هذا
لكن بالكويت .. تشوف بين فترة و فترة ضبطية .. حمولة مهربة من دولة خليجية .. ولا شاحنة بتهرب بطول ويسكي .. هذا كله .. ولا شي .. الخافي اعظم و الداش أكثر

تدري شنو الاستفادة من منع الخمور؟
علي المفيدي الله يرحمه يوم مثل دور السكران بحامي الديار قال سعر البطل ٣٠ و بالويك اند خمسين و ما تحصله
ركز هالحجي بالثمانينات
ظلت هالتسعيرة متعارف عليها لي التسعينات و بعدين صار تقريباً يبدى من ٥٠-٧٠ 
بالسنوات الأخيرة .. بطل الريد ليبل "ارخص أنواع الويسكي تقريباً" وصل سعره ببعض الايام ١٢٠ دينار
تدرون جم سعره الأصلي؟ 
٢٥-٣١ دولار
يعني دوبه يطق عشر دنانير 

من الواضح ان في ناس مستفيدة حيل من الموضوع ولا جان ما استمر المنع و الشعب نسبة كبيرة منه شريبة .. لكن الحجي .. منو المستفيد؟ 

فتكم بعافية