Tuesday, March 31, 2009

البطة السوده !


منوا فيكم حس من قبل انه صاير البطة السوده بعايلته ؟؟
:)

Thursday, March 26, 2009

P.Day ;D

انشالله مدة بسيطة و اوقف نفس وقفتج ;D
يا جماعة الخير
الحاضر يبلغ الغايب
و الغايب لما اييي ,, خل يسأل الحاضر
I MADE IT ;Pp
خل اقولكم اليوم باحداثه من أوله
طبعاً امس بالليل رحت دوانية المنبر لثاني مرة بحياتي و احتمال تكون الأخيرة ,, مع انه والله سؤالي كان بريء بس الله يهداهم كله فاهميني غلط ,, ما علينا شياب و متنرفزين من السياسة ;Pp
المهم انا رديت البيت و تعشيت شابورتي المقررة يومياً و هالحجي كله خلصته الساعه تقريباً 12 و نص
حلوات ؟؟ لأنه صبا قالتلي ما يصير اقول حلوين ;D
المهم انا وقت المنبه مال التلفون عالساعه 6 الصبح
جان اناااااام
و صارت الساعه 6 الصبح و رن المنبه !!
جان اقول خيولللللللي زييييييين محاضرتي تسع شيقعدني الحين !!
المهم عالسبع جان اقوم ,, و اشوه انه كتاب المودرن دراما يم راسي كنت حاطه
قريت شوي من المطلوب
خل اقولكم انا شمسوي
خوش انه المطلوب مني
Biographies
انا رصيت معلومات لها أول مالها تالي بالآوتلاين ,, جان البارتنر مالي يقول
" علي ترى الدكتورة ما تبي وايد حجي حاول تختصر "
على الله الدكتورة ما تشوف هالبوست ;D
" She's a famous Blogger ;D "
المهههههم
جان اعدلها له و دزيتها قبل لا اروح الديوانية
الحين نرجع حق قعدتي من النوم
قعدت جان اقرى و اراجع معلوماتي
و للحين خايف انا اني ارتبك بالكلاس ;D
المهم جان اصلي الفير و لبست دشداشتي و شماغي الأحمر ;D
و لبست جوتيي و توكلت على الله
و دقيت السيارة سلف
كان في شي غريب بالشارع
الشارع ساااااااااااااااااااااالك
طالع من بيتنا 8 و خمس وصلت الكلية 8 و 29 دقيقة !!
في شي غريب
قبل لا ادش الكلية نزل علي الوحي و قمت أنوت الملاحظات الي ابيها ;D
بعدين جان اعيّن من الله خير
و انزل من سفينة نوح ,, اقصد الجيب مالي
و دشيت الكلية
و طول محاضرة أساسيات كتابة البحث انا قاعد اراجع و انوت حق البرزنتيشن !
اكتشفت انه البارت مالي مو طويل مثل ما كنت متصور ;Pp
المهم جان يخلص الكلاس و رحت الحين ناطر عند باب الكلاس
جان تييني الحالة :(
انا لما اكون مغتر و متنرفز تييني حالة شلون اوصفها
اصير جني قاعد اطق رقبة بس بدون لا احد يحس
و هالشي كللللللللللللللل مرة لما اتنرفز يصير فيني
بس اليوم كان واضح لدرجة انه في سيكيورتي و واحد يمه قاعدين يشوفوني و يضحكون =/
عاد جان اقول خل ادش الكلاس
دشيت الكلاس
قعدت اراجع و جني الجندي شلون يتاكد انه رشاشه ما راح يخون فيه قبل المعركة ;Pp
المههههم
كان في قبلي بنتين قدموا برزنتيشنهم و كان تمام لأنه فيه بوربوينت
عاد جان الدكتورة تقول
دور منو الحين ؟؟
جان ارفع ايدي ;D
المهم قام رفيجي و وزع الاوراق انا قمت وراه لانه الدكتورة قالت ممكن ما يكفي الوقت فانا نطرت شوي بس بالاخير قمت قبل لا تعطيني الاوكي ,, ما انفع طيار ادري ولا جان الحين مفيش بالطيارة و الي معاي لاني ما انطر الأوكي ;D
والله و قمت و جان صاحبي يقول بتوزع ؟
انا عبالي قصده انه اخذلك ورقة
ما دريت اني بوزع لما اكتشفت انه معطيني وااايد اوراق ;Pp
وزعناهم
و صاحبي بدى البرزنتيشن
والله بصراحة أبدع زميلي يعني ما توقعته جذي
جان ايي دوري
الدكتورة قالتلي ,, يكفيك عشر دقايق ؟؟
انا قلتلها اييي يكفيي ;D
المهم جان يبدى البرزنتيشن
تكلمت و اشوه اني ما قطعت ولا كعيت بالحجي
بس الي استغربت منه شي واحد
بديت البرزنتيشن و خلصت و انا بنفس الوقفة جني هذولي الحرس ملوت بريطانيا ;D
بس اشووووووووووووه خلصت البرزنتيشن و ارتحت
any Questions ??
Thank You ;D

Wednesday, March 25, 2009

CHANGE IN PLANS ;D

باجر البرزنتيشن
ادعولي ;D

Sunday, March 22, 2009

Theory of Seasons

Howdy! ;D

طبعاً أنا وعدتكم اني بكتبلكم بوست طوييييل عرييييييض عن شسمها الدورة الي حضرتها الي اسمها : نظرية الفصول

طبعاً انا قلتلكم منو الي يحاضر فيها الي اهو الرااائع عيسى عادل العيسى

طبعاً اهو لاهو سيغموند فرويد ولا تشارلز داروين


اهو انسان عادي نفسنا ,, لكن الفرق انه اخذ دورات بهالموضوع و اهو هذا كان شغله بالأساس و اهو اشتغل على نفسه و طلع لنا بنظرية الفصول ;D

بس مو تقلدونه راحت عليكم ;Pp


المحاضرة كانت بقاعة سلوى

اول مرة ادشها و اقعد فيها مو داشها الا مرتين من قبل خطفت ريلي و طلعت ما طولت فيها

المهم

طبعاً القاعة وااايد حلوة ;Pp

و البوفيه هم وايد حلو ;Pp

بس مو هذا موضوعنا

الفصول تعبر عن شنو يا حلوين ؟؟ ولا المفروض أقول يا حلوات لأنه أكثر الي يحطون كومنتس إناث ;D

المهم يا حلوات ,, و يا حلوين

الفصول عن شنو تعبر ؟؟

الفصول اهي اطباع البشر ,, كل واحد فينا يكون إما ربيعي أو صيفي أو خريفي أو شتوي

و كل واحد فيهم له خصائصه و مميزاته


أنا طبعاً ما راح اعطيكم كل الديتايلز لأنه اساساً هالسوالف ما قدرت الحق و انا اكتبها بس راح اكتبلكم مشاهداتي عن كل فصل و انتوا كيفكم عاد ;Pp




لأنه ماشالله مفصل حق كل فصل شنو كل شي يركب له



الصيف




الصيفي مثل الصيف بالضبط ,, حركة و نشاط و وناسة و حماس طول الوقت ,, لكن هالشي ممكن يأثر على انتاجيته انه عنده زحمة افكار و مو قادر يركز على وحده فيهم




مرح جداً صاحب هالشخصية لكنه بعض الناس ممكن ما يتقبلون انه مرح و قد يعتبرونه وقح ,, لكن انا استانس على هذولي الي نفس عدي ;Pp

ما يحب يقعد بروحه ,, هني صج تذكرت عدي الي بمطار دبي ,, كان شايفنا قاعدين انا و اخوي و اهو بروحه جان يقولنا و اهو يصارخ ممكن أجي اقعد وياكوم ؟؟ ;D

مندفع ,, نسبة الريسك عنده ما يهتم فيها


BIG MOUTH ,, ما تقدرون تخشون عنده سر لأنه باختصار واااااايد يتحجى و بكل شي مع كل الناس ,,, يعني الصيفي حتى لو قالكم انه بيخش السر قولوله لا اسمحلي ما اقدر لانه تقولون له السر يروح يقوله حق اول واحد يسولف وياه !!

عنده حب العمل ,, يعني لما يكون عنده تاسك مهم لازم يخلصه يشق الأرض بالنص و يخلصه


عجوووووووول ,, يموت عالعيلة و كل شي عنده دبجة دبجة !! مشكلة ;Pp

على ما اذكر اهو و الخريفي القياديين ,, لكن اهو اقوى من الخريفي لانه يفرض شخصيته بشكل قوي و مهيمن


وايد يمدح عالطالعة و النازلة ,, بس لا تاخذ على مدحه لانه ببلاش ;Pp

نروح حق الخريفي ,, انا ;Pp




مفكر و مخطط جيد



متحدث ممتاز



يجيد كتم الاسرار ;D



يفرض شخصيته بطريقة غير مباشرة ,, يعني على قولة الي كانت معاي ,, يحسس الناس جنه ترى أنا موجوووووود ;D



ما يرتاح حق الناس من أول نظرة ,, عكس الصيفي الي يرحب بالكل بحرارة ,, هذا نفسي انا ,, يعني تلقوني اسلم عالشخص اول مرة و آخذ و اعطي وياه و حتى لو ما ادانيه بس اهو اهم شي ما يحس بهالشي ,, بس عاد بعد فترة خل يتحمل امر يمه و اسوي نفسي مو شايفه ;Pp



مو مندفع ,, يحسب حساب الخطوة ألف مرة على ما يسويها ,, وسوااااسي بشكل منقطع النظير ,, بالضبط نفسي ,, اتوقع سنعه تذكر و خروفة هم تذكر اهم كانوا معاصرين هالحقبة ببلوقي ;Pp



خبيييييييث و عادي عنده يبوق مجهود غيره ;D

مو زين يلومك ,, والله يخليك تتحسف عالغلط الي سويته ,, يعني ذكر مثال الي داش بغيبوبة سكري ,, الخريفي اذا دش عليه احتمال يسويله استجواب ,, انت شماكل و ليش مخربط و ما تخاف على عمرك و شوف شصار فيك و انت ما تهتم ,, وييييييييه ما تخلص ,, انا جذي مع ربعي لما يغلطون ;Pp

الضمير نوعاً ما ميت عنده ,, بس مو زين يشتغل عنده يخليه متأزم ;Pp



قانوني ,, بس عنده امكانية انه يتغاضى عن القانون حق مصلحته عكس الصيفي الي يموووووت على كسر القوانين خصوصاً اذا كانت ضده ;Pp



على قولة عيسى العيسى



إذا مدحك الخريفي اعرف انك مسوي شي جبيييير و انك صج تستاهل التقدير



لأنه الخريفي و الشتوي بالزوووووور تطلع منهم الكلمة الحلوة ;D


عدواني نوعاً ما بالشغل يعني ممكن اذا تواجه اهو و واحد خريفي نفسه تصك بينهم بالشغل ;Pp




ممكن الصيفي يحرقه :(



نروح حق الربيعي





الربيعي هذا فقيييير


تلقاه مسكين و طييييب و على نياته


و صييييييييده ;Pp


يحب كل الناس


يمدح الناس عالطالعة و النازلة


يثق بالكل و ياخذ بكلام الكل ,, يعني ممكن اي واحد يقوله اي شي و يصدقه


عنده حدس مو طبيعي ,, حدس يعني مثل الحاسة السادسة مو عيال الروضة ;Pp

وااااايد عاطفي لما يسولف يعني يحسسك انه كريمة مختار ;Pp


ما اذكر انه في شي مميز خلاني انجذب حق الربيعي


نروح حق الشتوي


الشتوي بالضبط مثل فصله

باااااااارد

مافيه مشاعر ولا تعابير ولا شي

ممل نوعاً ما

يحب شغله

عنده اتقان بشغله بدرجة مو طبيعية لكن عنده مشكلة كبيرة ,, مافيه ابداع ولا ابتكار يعني يهتم بالكواليتي مال الشغل المكلف فيه اكثر من التنويع

يموت على شي اسمه لسته ,, يعني لما يكون عنده لستة اشياء يسويها هذي قمة المتعة بالنسبة له انه يشطب عليهم واحد واحد

مرتب لدرجة مخيفة يعني لازم الجوتي لونه نفس لون السكسوكه و السكسوكه لونها نفس لون العقال و العقال لونه نفس لون الدلاغ ,, طبعاً كلهم لونهم اسود ;Pp

يهتم بدقائق الأمور ,, يعني العيسى ذكر موقف انه كان واحد من ربعهم صايرله حادث جايد

اهو كشخص صيفي كان مشتط و حالته حالة و متنرفز ليش انه الشتوي الي معاه كان باااارد

لكن باعترافه شخصياً انه الشتوي هذا كان يرعى رفيجهم الي تعور بالحادث بنسبة 90%

يعني يقول نسبة أداءه اهو الصيفي من 100% يمكن تكون 20% اما الشتوي فالعكس

ينفع يكون محاسب ,, مدير مالي ,, اي شي فيه فلوس ;D

ضميره لاعن خيره ,, و استحااااالة يخالف القانون مستحيييييييييييل بالنسبة له

إذا مدحك ولا عطاك هدية ويييييييييييييييييييييه اعرف انه انت جبيييير على قولة بوخرشد

ما يعرف الكلمات المناسبة لاختيارها يعني مثلاً ذكر موقف انه لما واحد شتوي بيعطيك هدية بعيد ميلادك ما راح يقولك كل عام و انت بخير ,, بيقولك هذي حق عيد ميلادك ;D

بسسسسسس هذا كل الي اذكره و اول ما يوصلني الفايل مال الشسمه اكتبلكم الباجي ,, بس والله وناااااسة لا تطوفكم الدورة

طبعاً في وايد اشياء ناقصة بالبوست مالي بس قلت احطه لكم عشان تاخذون فكرة حلوة عن الموضوع

لانه هم يقولك شنو الوظايف الي ممكن يبدع فيها كل واحد و منو ابرز الشخصيات و شنو يحب و شنو يكره و شلون تقرب منه و شلون تكشه ويييييييييييييييييه بلاااااااااااااااوي يقولكم

يلا نشوفكم على خير ;D

Monday, March 16, 2009

ضميري منأبتني :(




اليوم و انا طالع من كلاسي العصر
شفت شي يحرني


خلاني أبقبق أبقبق من داخلي




و انا نازل من الكلاس ولا جبالي استراحة الشباب




شفت داخل اثنين قاعدين




شوي جان تيي وحده و توري واحد فيهم شي بالتلفون




وحده منقبة بعد !!




قلت يمكن في شي غلط




شفت مرة ثانية قعدت اركز




هذا شعار الرابطة !!




و البنت مو بره البنت داخل !!




تهقون شافوني ؟؟ ;Pp^^




المهم جان ايي واحد وراي




قلتله يا فلاان




شوف جدامك في شي ؟؟




جان يقولي ايي هذا صبي شعره طويل




جان اقوله في بنت داخل ؟؟




جان يقولي ايي معاهم بنت ,, كاااك




بغيت اكفخه عالكااك بس قلت مو إلا ;Pp




جان اقوله الحين شسوي




ما يصير جذي هذا غلط و انا ما ارضى بالغلط




جان يقولي والله مادري كيفك تبي تقول حق السكيورتي قول




جان اقوله هااا ,, اقول أو لا أقول ؟؟




المهم بالنهاية جان اقوله انا بقووول المهم انام و ضميري مرتاااحة ;D




المهم الحين انا والي معاي رحنا كل واحد من صوب



توني ماشي بالشارع ولا الف ويهي صوب الممر




ولا واحد " ألماني " ,, منشي الشماغ و مضبط السبعه و ماكو الحبيب جنه أمير سعودي




قاعد يتحرش ببنت أشكره عيني عينك !!




يا جماعة موووو جذي الإنحدار




ما يصير هالإنحدار بمستوى الطرح




طول عمري ادافع عن هالكلية و اقول هالفئة ما لازم تحكمون منها عالباجي




بس مو جذييييييي يا جماعة البنت ماشية بحالها و هذا يتحرش فيها




شنو اعنبو خيرك عبالك داش مجمع العنود ولا أجيال !!





ما علينا منهم



رحت حق السيكيورتي




ولا الحبايب يسمعون احمد عدوية !!




جان اقولهم يا حباااايب




يا كااابتن انت وياه




جان يرد علي واحد يقولي




خير في ايه يا باشا




قلتله انتوا قاعدين هني و المسخرة عالآخر بالكلية !!




جان يقولي فيين !!




قلتله روح استراحة الشباب في بنت داخل !!




جان يقولي و اهو يضحك




بجد ؟؟




هذا الي برفسه !!




جان اقوله روح شوف بعينك شنو بجذب عليك شنو ميانة بيني و بينك !!




جان يروح ينادي حمادة صاحبه و هني انا مشيت و خليتهم يولون




بس والله الكلية صايرة زبااالة




ذاك اليوم واحد بغى يقط وحده من فوق




و اليوم هذي بالاستراحة و البنت الي تحت




لحد يقولي انت مع التعليم المشترك




انا مع التعليم المشترك لي آخر يوم < صج يحرجي لكني معاه ;D




لكن هذا الي صار لاهو تعليم ولا قالها الله




هذا اسفااااف




هذي مسخرة




حتى لو كانت اخته




هل يرضى انه اخته تنحط بهالموقف و اي واحد ممكن يشوفها بهالمنظر شبيقول عنها بعد الحادثة الي صارت الاسبوع الي طاف !!



انتوا قولولي الي انا سويته صح ولا غلط ؟؟




لأنه ضميري حبيبتي منأبتني :(








*****





أمس رحت دورة " علم الفصول " بدعوة شخصية من الرائع الي يقدمها الاخ : عيسى عادل العيسى



حقيقة استمتعت و كنت بكتب هالبوست عن هالدورة لكن الي شفته بالكلية خلاني أبقبق أبقبق ;D



انشالله البوست الياي عن الدورة بيكون بس عسى ما اشوف شي يخليني انفجر مرة ثانية ;D

;*



Monday, March 9, 2009

I'm Shy :$


KUWAIT ,, I HAVE A PROBLEM
عندي كلاس بالكلية مختلط
و انا عندي مشكلة ويا هالنوع من الكلاسات :$
أنا أستحي اقعد بمكان فيه وايد حريم ,, ساعات ينربط لساني بهالاماكن :$
يعني كل مرة اخلص من كلاس اساسيات بحث اروح هالكلاس و الدكتورة ما تكون ياية للحين
انا اقعد داخل ,, لأن ماكو أحد أقعد وياه بره ربعي كلهم مو صوب الكلاس
و الي بالكلاس الشباب اوكي اعرفهم بس مو ربعي ربعي نفس الباجين
فكل مرة اقعد بالكلاس اقول اوووف متى تيي الدكتورة
و أتنرفز اقعد طول الوقت بس أرسِم مربعات :/
و طول الوقت عيني تروح يمين يسار يمين يسار اشوف شقاعد يصير بالكلاس
أشياءات غريبة عجيبة تصير بالكلاس يا اخوان و يا اخوات
اهي مو اشياء مو زينة بس اشياء funny :p
و الدكتورة قالتلنا عندكم برزنتيشن
و انا مادري شسوي يعني حتى الصبي الي بقى ما اعرف بس كنت بضمن عليه لما كان مستجد
و البنات اكيد ماكو وحده فيهم راح تسوي البرزنتيشن معاي لأنه اساساً ما يعرفوني فيهم الا جم وحده و العلاقة
RUNIED ;Pp
و عليه 15 درجة هالبرزنتيشن :(
آل يعني عامل فيها سبع و ماخذ كلاس فيه بنات
:@
شالحل ؟؟
أبي اتخرج و لازم اخلص مواد و مابي اتعطل زيادة بس بنفس الوقت احس اني ما راح اقدر اسوي شي بالكلاس بسبة هالمشكلة :(
يعني امس كانت الكراسي بالكلاس صايرين صفوف ,, يَو البنات بيعدلونهم
و انا قاعد بمكاني ,, قلت والله الحين هذي البلشة خوفك يقولولك قوم بنعدل الكراسي
و اساساً ما ساعدتهم
جان اسأل وحدة فيهم سؤال عبيط مادري شلون طلع وياي
" لازم نسوي الكراسي جذي ؟؟ "
جان تقولي ايي
انا هني قلت عيب اقعد جذي قمت و حركت ثلاث كراسي وياهم =/
قولولي شسوي ؟ :/

Sunday, March 8, 2009

ربنا ما يحرمك من العبط يا شيخ ;Pp

إذا الديمقراطية عوير و زوير و المنكسر و الي مافيه خير يتكلم فيها و الكل يوصل فيها
عيل شماله انت و ربعك ميتين على الكرسي الأخضر ؟؟
و جنه كللللش انت و ربعك ما تكفرون القاصي و الداني على أدنات الدون
لا و أحلى مافي الفيديو لما يتكلم عن الخلاف بين الشيعة و السنة و انه الديمقراطية اهي سببه !!
و اهم مافي الموضوع يا إخوان هو أن الشورى مو كل الناس يتكلمون فيها غير الديمقراطية الي اهي حق عامة الشعب

;D

Monday, March 2, 2009

البنات و الصيف !!


امس بالليل خلصت قراية هالمجموعة من القصص القصيرة
قبل كنت اسمع عن روايات احسان عبدالقدوس
طبعاً حالته نفس حالة نزار قباني
الكل يسبهم و يصفهم بالتفسخ و الانحلال و الخلاعة
لكن انا و في خضم عملية بحثي عن كتب بايرون و كولريدج و ووردسورث < أسماء أبعد ما يكون عن احسان أفندي ;D
لقيت هالرواية
الغلاف شدني بصراحة ;D
بس قلت خل اقراله دامني جداً فاضي
والله و فتحت الغلاف و بلشت أقرى
البنت الاولى
مايسة
صعبة جداً هالبنت ,, حبيتها بصراحة بالبداية انها من النوع الي تقدر تاخذ كل شي تبيه بدون لا تعطي شي ,, شخصيتها قوية
لكنها ما كانت لاقية الرجل الي تقدر تحبه بين كل الشلة إلا لما شافت هالصعيدي بكر ,, قهرنيييييييي لما بالنهاية قريت الوصف مال نفوسة ,, حسيت اني لو اعرفه جان داش فيه مؤبد ,, بئه يا واد يا رمه عندك العسل ده كله و تسيبه لحتة البصل ,, مالت عليك انا اقول بس مالت عليك ,, بس اهي مغفلة هم عطت حق بكر كل شي على شنو مادري
نروح حق البنت الثانية
بالحقيقة اهي مو بنت ,, اهي سيدة مجتمع راقي
لكن الباشا الجريح الي عندها ما عاد يساوي نِكلِة ,, و اهي وحده توها صغيرة نسبياً يعني لسه الحياه أدامها طويلة
و ما لقت الا هالياهل عشان تحبه ,, ما اهمه يقولون الحب ما يعرف عمر ولا وقت ولا شي
لكنها خبيثة صج شلون دمرت حياة البنت الي الصبي يحبها
هم بطت جبدي لكن اهي الوحيدة الي كانت قوية بينهم
البنت الثالثة
وفية
والله هذي لما خلصت قصتها بغيت ادش بالقصة و اذبح رفيج زوجها و زوجها بنفس الوقت
بنت مسكينة ,, حاولت تدافع عن نفسها لكن زوجها الغبي الدايخ الي مسلم الخيط و الخيط حق رفيجه مال طق
للأسف اني سمعت عن نماذج من هالبنت بحياتنا
البنت الرابعة
البت فتحية
هذي الي صج كسرت خاطري ,, لما قريت قصتها قعدت اتذكر فلم " نحن لا نزرع الشوك " للرائعة و العظيمة نادية لطفي
لما يجبرها الزمن انها تشتغل كل شي بعد ما كانت معززة مكرمة لكنها تضطر بالأخير انها تبيع جسمها حق احقر الناس عشان تعيش ,, هالبنت مشكلتها حبت باخلاص و كانت مستعدة تبوق عشان حبيبها ,, لكن جدامها عقبتين ,, الريال أو بمعنى آخر الذئب البشري الي مل من مرته الي صارت كومة لحم مع الأيام ,, و زميلة الكار الي كانت حاطة عينها على حسنين و اهي الفقيرة قالتلها خطتها عشان تحصل الفلوس حق حسنين بيه الحمار و اهي راحت قالت حق حسنين ,, والله كسرت خاطري صج هالشغالة كل ما اتخيل شلون ظلمها هالمفتري ابو كِرش :@
البنت الخامسة و الاخيرة
ناهد
ناهد هذي في منها واااايد ,, ما يرضون بالمقسوم ولا يرضون بولد الحلال الي يسترهم و يحافظ عليهم و يحبهم ,, هذي تبي تعيش حياة نجمات هوليوود ,, حفلات و سهرات و ملابس و فلوس و سيارات ,, و ولد الجيران الي ظلت تمرمط فيه سبع اشهر ما كانت عنده هالمقومات ,, و اهي بنت حلوة و رشيقة و لو صورتها نزلت بالمجلة الخطابين بيصفون طابور عند بيتهم ,, لكنها بالنهاية طاحت بحبال هشام ولد العز الي اخذ منها لين شبع و بالاخير هم الولد محمد حذرها جان تصده و اهو مشى عنها رغم انها من داخل تحبه لكنها كانت طماعة تبي الصبي الغني المزيوون و ما تبي الصبي الي معاشه 25 جنيه ,, و بالاخير طاحت على ويهها لما هشام شفط عليها تشفيطة جي تي 77 في يوم ماطر ( صورة بلاغية مو صجية اتحدى فيها دكاترة العربي ) و آخر شي تقدملها واحد عمره 45 الظاهر شاف صورتها بالمجلة و قال هيَ دي ,, و اهي قعدت تبجي بغرفتها عند آلة الخياطة
بالنهاية
بخلاصة الكلام و بعد ما قريت هالخمس قصص القصيرة
بخلاف انه فكرتي تغيرت عن احسان عبدالقدوس و راح ادور سلسلته الكاملة سواء بالكويت أو أطلبها من بره
لكن اهو طرح نماذج موجودة بحياتنا
لا ننكر وجود البنات الطماعات مثل ناهد او الحريم الي ينسون نفسهم مثل زوجة الباشا بثاني قصة
و أيضاً لازم ما ننكر وجود ناس استغلاليين مثل بكر و هشام و اسماعيل الي كان يغتصب وفية اول ما زوجها يمشي عنها !!
و ايضاً لازم نهتم بالاشخاص الي مثل وفية ,, الناس المساكين الي اهلهم ما زرعوا فيهم الشخصية و لازم نتفهم احتياجاتهم و نوقف وياهم لأنهم مساكين و بسرعة ينقص عليهم و أساساً يمكن تم القضاء عليهم لما ادخلوا بمعترك الحياة الزوجية
و أيضاً القصة الاخيرة فيها رسالة حق البنات الي يسعون ورى اللهو و الفشخرة ,, كلنا نحب نستانس و نتبسط و نفرح ,, لكن لما بنحب ,, لازم نحكم عقلنا ,, و نسمع موال رويشد* الي ما اذكر بأي اغنية قاله الي كان يتكلم عن ثلاث خطاب متقدمين حق وحده
و بالنهاية ربنا يحميكوا كلكوا و يخليكم لأهلكم ولا يوقعكم بايد ناس ما يعرفون قدركم :)
اليوم يايبلكم اهداء باربراوي سترايسنداوي
* الي يعرف اسم الموال او عنده اياه ام بي ثري يدزه لي والي يعافيكم او يسويله ابلود و يختصر علي و عليه الطريج و له مني خالص الدعاء ;D