تعرف عليها قبل سنتين
كان جداً متحمس لعلاقته وياها
بالبداية ما كنت أدري انه يحب
الصبي كان يضحك على الشباب الي يكلمون
و يزف الي يلعبون عالبنات
لأنه كان يقولهم الدنيا دوارة
ليما على يوم جذي و احنا قاعدين بساعة صفا
جان اقوله
بوحمود ,, انت ما حبيت من قبل ؟
جان يقولي لا والله من قبل ما حبيت
توني ياي بقوله شي
جان يقولي انا الحين احب !
انا عيوني طلعت !
بوحمود يحب !!
شلون ؟
وين ؟
متى ؟
جان يقولي تذكر مناظرة القوائم الي صارت بالحقوق
قلتله اييي شلون ما اذكرها
و انت ما ييت بوحمود و انا زفيتك على هالشي
جان يقولي
تصدق انا كنت بالادارية يومها !
قلتله شنوو !!
اي والله كنت بالادارية
زين شعندك هناك بمعقل الرأسمالية الفاسدة ؟ ;Pp
جان يقولي كنت ناطرها
أثريها كانت معطته نوت و فايل و اهو متولع بويهها القمري
و خدودها الوردية
^^ لما قالي هالوصف حسيت انه سعد البياتي جدامي مو رفيجي ;D ^^
المهم قلتله زين و بعدين شسويت كلمتها ولا لأ !
جان يقولي ايييي من صجك
الاسبوع الي طاف ثلاث ايام داقلي خيمة بالادارية و الشماغ ما طاح من راسي و الريحة تقول مصنع جيفنشي متحرك
المهم يقولي قعد من الساعه 9 الصبح لين جريب المغرب بالكلية
ليما بالغصب قدر يكلمها و يعطيها الرقم
المهم قالي انه مع الأيام حبها حييل
و على قولته
كان يروح عند بيتهم يشغل اغاني علي العيساوي ;D
و على وجه التحديد اغنية
" كــون يــمــك "
يقولي كنت اقعد بالساعات عند بيتهم بس اسمع هالاغنية
رفيجي يمر عندي يقولي انزل الدوانية الشباب كلهم هناك
و ام رفيجي تييلي تقولي جاسم شفيك
و الولد سرحااااااان
المهم بعد هالفترة الصبي قطع عنها
يقولي خايف انها تحبني و انا مو ويه حب
ما يعرف يتعامل مع البنات و ما يبي يظلمها معاه يخاف انه بيوم
من الأيام يغلط عليها ولاشي من هالأشياء
فاهو آثر الابتعاد
اهو بعد هالابتعاد صارتله مشاكل
و طلع من الجامعة
و محد وقف وياه بذاك الوقت غيري انا و نسيبه
و انا الي شجعته انه يطلع من الجامعة عشان يلحق على عمره و لا يضيع نفسه
ليما بذاك اليوم و احنا خالصين من قزتنا
لنه كان ضايق خلقه
جان اقوله
" بوحمود ,, الي انت تحبها شصار عليها "
انا ما كنت ادري شسمها
ولا كنت ابي ادري لانه هالشي خاص فيه و محد له الحق يسأل عنه
جان يقولي تصدق مادري عنها
احبها بس ياخي والله مو قادر انساها بس قاطع عنها
قلتله ليش
قالي ,, تدري فيني مابي أحب
" طبعاً انا كنت قايله الي صاير معاي و اهو كان يضحك علي و يقولي انساها و مالك شغل فيها و لا تصدق انك تحب "
المهم جان اقوله الحين انت مو تحبها
قالي بلى :(
قلتله ما تبي تتزوجها ؟
قالي بلى :(
قلتله عيل يا مال الضربة شماله ما تكلمها ;@
جان يقولي مااادري بونجف مااادري
قلتله هااات تلفونك اهوو
خلني انا ادزلها مسج ;Pp
والله ما اذكر شنو كتبت المهم اني ما خليته لأني ادري ان خليته ما راح يسوي شي
و دزيتلها المسج
و قلتله خلني على علم بالتطورات الي تصير معاك
أريغاتو << متأثر بمسلم البراك ;Pp
شوي جان يدق علي الصبي يقولي بونجف هذي ردت علي
صوته كان متغير
قلتله خير شقالت
قالي : قالتلي الغلى انت الي تناسيته مو انا
^^ المسج كان اغنية حق راشد بس شنو اهي ناسي شكتبت ;Pp "
قلتله هاااااااااااا :×
هذي والله البلشة
قلتله
بررلها ظروفك يا بوحمود افا عليك بس
قولها كانت عندك ظروف قاهرة و محد يدري فيها الا الله ثم بونجف ;D
المهم جان بعدها بساعه جذي يصحيني من النوم
قلتله خير شصار
جان يقولي صاحبتها دقت !!
انا هني طقتني البوهة قلت شالسالفة ;D
المهم ولا اثري البنت قايلة حق صاحبتها و صاحبتها داقة على رفيجي قالتله
" ترى كلمة أحبك تكفي "
انا قلت هاااااااااااااااااااااااااااااااااااااااااااااااااااا
يتمنعن و هن الراغبات ,, شيطونااات ;Pp
و اليوم الي وراها الصبي كلم البنت
و اليوم الي وراه طلعو مع بعض
والله لو اوصفلكم ويهه شلون كان يكلمني عن لقائهم و اهو مستاااانس و الدنيا مو سايعته
قلتله زين متى الملجة
قالي اول ما ارجع من الحج
قلتله حلو خير البر عاجله بس كلم الأهل بالأول اخذ موافقتهم
و كلم امه و وافقت
و ابوه تحمس و وافق
^^ ما عندهم الا هالصبي الباجي كلهم بنات ^^
و حتى ابوه قاله بهالموتر الي عندك ما ازوجك بالاول اشتريلك موتر أوادم
بيني و بينكم موتره بغى يودرنا مرة ;Pp
و ابوه مدح ابوها و قال ايي و نعم هذولي خوش ناس
^^ على اساس انه يعرفها من الكلاس بس ;Pp ^^
المهم يا جماعة الخير مالكم بالطويلة
يوم اليمعة اللي طاف
و انا توني داش فراشي
و ليلتها الفراش الله وكيلكم داااااافي
شوي جان يرن تلفوني
ولا هذا بوحمود
" هلا بوحمود هلا حبيبي خير شصاير "
" بونجف أبيك تمرني "
" بوحمود لازم ,, والله تعبان "
" شفيك شنو كنت نايم "
" اي والله توني نايم ,, يعني ضروري ضروري امرك "
" والله هااا ,, خلاص روح نام بونجف حبيبي "
الصبي صوته ما يطمن
قلبي طاح ببطني
والله خفت لا يكون صايرله شي
شوي جان يدق مرة ثانية
" خير حبيبي بوحمود شفيك "
" بونجف لازم امرك "
" يبا مرني خلاص مرني انا قاعد "
والله ما طول عشر دقايق الا اهو عندي
" بيتهم قريب من بيتنا مو دايس ولا شي ;D "
انا لبست بنطروني و جاكيتي و طلعت
اشوف ولا الحبيب كاشخ
جنه معرس !
ركبت السيارة جان اسمعه يكلمها
يقولها خلاص مابيج تكلميني
و حسيت من نبرة صوته انه فيه داخله شي
و شي جايد
وده يبجي بس اهو اعرفه ما يقدر يبجي جدام اياً كان
المهم كل دقيقة يقولها خلاص
الله يوفقج
خلاااص لا تحنين
ليما آخر شي قالها فكيني عاد و صكه بويهها !
انا هني قلتله
خير ,, فليتوا ؟ ما مداكم !!
قالي تخيل
من الصبح طالع وياها
رحنا كارينوز
و رحنا سينما
و رحنا تشوكلت بار
و رحنا ميس الغانم
و آخر شي بنهاية هاليوم السعيد تقولي
" ترى انا مخطوبة حق ولد خالي "
انا هني حنجي طاح بحضني !!
قلتله من صجك انت
وين كلامها
وين وعودها
وين كلمة احبك الي تكفي !
يقولي اليوم قالتلي
انها كلمت امها و امها قالتلها ترى انتي محجوزة حق ولد خالج لا تسويلنا سوالف و لعب يهال و تحرجينا معاهم !
انا انقهرت اكثر منه
^^ yeah yeah you can tell ;X "
انا انصدمت بصراحة
و الصبي متنرفز
يقولي يعني شنو كانوا ناطرين امي تروح عشان يردونها و اطلع بالشينة جدام امي !!
و شنو يعني البنت محجوزة حق ولد خالها
و ليش تقولي الحين
و ليش من الاول ما قالتلي
و ليش تقولي انها تحبني
ليش خلتني اتعلق فيها
و المشكلة تخيلوا انها بعد كل الي سوته تقوله و بكل وقاحة
زين عالأقل خل يكون بيننا مسجات !!
مسجاااات !!
لابوووج ,, لابو آبوج ,, لابو آبو آبوج !!
^^ هذي من عندي مو من عنده ^^
^^ انا هني بغيت ابجي لما سمعته شلون يتكلم ^^
قلتله
هون عليك يا بوحمود افا عليك بس
مو انت الي كنت تقول السمكات بالبحر كتاار
ياخي عدها سمكة و راحت افا عليك بس
ولا تسوي بعمرك جذي
^^ كان يدخن بشكل مخيف حزتها الزقارة ما تطول دقيقة بايده ^^
شوي جان يقولي
والله يا بونجف الحين حسيت فيك لما كنت تقولي انك تحب فلانة و شنو الشعور الي حاشك
^^ ما اخفيكم قلت بقلبي ,, اي منت اول ولا آخر واحد ,, كلهم يعيبون علي و بعد فترة اشوفهم بحالة اصعب من حالتي ;/ ^^
جان اقوله هونها يا بوحمود افا عليك بس
زين انها يت من الحين يمعود
و قلتله خلاص انشالله يوم الأثنين انت محرك رايح الحج و هناك بتنساها انشالله
و الحمدلله ليلتها عدى الموضوع و خليتها يستانس عالأقل ما نام و اهو متكدر
*****
ترى هالقصة صجية بكامل احداثها
و من خلالها بوجه رسالة
يا فلان و يا فلانة
اذا انتوا منتوا قد الحب
ولا انتوا مستعدين تواجهين الأمواج الي بتييكم من وراه
فلا تحبون
و لا تخلون احد يتعلق فيكم لي هالمرحلة
خافوا الله بالناس و بقلوب الناس
ترى الدنيا دوارة :)
إهداء للقلوب المحطمة :(
إنتهى المشوار
