" حسوون "
" هاااااا "
" حسووون هذي منو ؟! "
" أي وحده قصدك ؟؟ "
" هذي هذي الحلوة الي تمشي هناك "
" إيييي هذي وحده ويانا بالقسم ... و انت شتبي فيها "
" ولك وحده ... صج هذي اسميها أنثى ... ولك هذي الي يكلمها أمه داعيتله "
حوار يومي متكرر بين حسين و جابر و اهم قاعدين بحديقة الكلية يشوفون البنات و اهم يروحون و يردون ... بس هالمرة غير ... هالمرة صارت تحدي بين حسين و جابر
" جبور تبيني أكلمها ؟ "
" ولك روح زين لو انا سيلانية بيت ييرانكم و عانس و مو طايفني القطار الا هدموا المحطة و انا للحين بمكاني ما اطل بويهك حتى "
" يا بو جبرة لا تتحداني "
" ولك أتحداك على شنو ؟! ضعيف و مشعر و محدب و فوق كل هذا شكبر خشمك و معيش نفسك الدور انك دي نيرو زمانك "
" زين جبور و اذا كلمتها شلي منك ؟ "
" مالك شي لأنه أدري ما راح تقدر "
" بنشوف ,,, زين يلا رد بيتكم لاني بروح اداوم محاضرتي و اشوفك اليوم المغرب "
و اهو ناطر الدكتور عند محاضرته بالطابق الثالث جان يلمحها و اهي تمشي بالسكوير و يسرح بخياله يقول هذي شلون اكلمها .. شلون اوصلها بالأول علشان أكلمها !!
و شوي و لا يلمح ذيج اليثلة الي تمشي يمها ... و يتذكر هالويه وين شايفه ... وين شايفه يا بوعلي وين شايفه
إيييي تذكرت ... بالمسنجر !
بس هذي ليش تسولف وياها و هذي اكبر منها ... و جنهم يشابهون بعض هالثنتين !!
و طول المحاضرة و اهو يفكر يقول معقولة تكون اختها ؟! ما يصير وحده مثل هذي تكون هذي اختها ... حتى ما يلوق تكون رفيجتها
و لما رجع البيت أول ما وصل داره جان يدش عالمسنجر ولا كاهي اليثلة شابكة
" دلال شلونج ؟ "
" الحمدلله بخير انت شلونك حسون ؟ "
" الحمدلله تمااام ,,, تعالي انتي تعرفين لجين الي بقسم الانجليزي ؟ "
" هَو شلون ما اعرفها ... لجينو اختي خو "
" اييييييي ... زين دلول انتي ليش ما تضعفين والله شكلج حلوة مثل اختج بس الشحم مغطي عليج "
" حسينو انت ليش جذي كلامك مو حلو انا اصلاً حلوة "
" حلوة ما اختلفنا بس الله يهداج حلاتج من حلاة البقر ملوت كي دي دي ... ضعفي علشان تصيرين احلى من اختج "
" أنا نفس بقر كي دي دي هاااا ... ماشي يا حسينو أنا أوريك "
و تفصل و انها زعلت اول شي بس بعدين لما قرت الايميل عرفت انه كان يضحك وياها
و ظلوا يسولفون مع بعض و ليما بيوم من الأيام تهده بروحه بالمسنجر ,,, شوي جان يقول الظاهر زعلت صج خو انا لا اسلوب لا عماة عين ,,, قام و دزلها ايميل قالها انه كان يتغشمر و من هالحجي و لما قرته جان تقوله
" حسيين .. ؟ "
" هلا دلول "
" بسالك سؤال .. ممكن "
" اييي ممكن سالي "
" انت تحبني ؟ "
حسين بهالوقت ما يدري شيقولها .. خصوصاً انه كان أساساً ما يبيها بس مع الوقت حبها و تعلق فيها و نسى سالفة التحدي بينه و بين جابر رفيجه
" دلال .. لو كنت ما احبج بتزعلين مني ؟ "
" لأ :( "
" زين شفيج زعلانة .. أنا أحبج دلال بس ما كنت أدري ان كنتي تحبيني ولا لأ و كنت ناطرج تقوليلي هالشي "
و من يومها و هالاثنين مع بعض شحلاتهم و بينهم ايميلات و كومنتس بالهاي فايف و يقولها كلام حلو و كلام منمق على قولة سعاد عبدالله ,,, بس حسين كان فيه طبع ,,, غيرته الزايدة عن حدها ليما توصل لحد المرض و راح تعرفون شلون
حسين قال حق جابر انه يحب دلال و جابر قاله انت مينون أكو أحد يحبله كبت !!
و كل ما كان يشوف دلال قاعدة قبال حسين يقعد يعيب عليها جدامه و يضغطها
ليما يت اللحظة الي جابر فيها شاف لجين تسلم على حسين ... هني جان يحتر ... شلون هالحلوة الي كل الكلية تبيها تسلم على هذا !! و نسى انه هذا حسين رفيجه
و بهالوقت هذا دلال كانت كله تقول حق حسين انه انت ابو عيالي و انا احبك و ماكو شي بيفرقنا عن بعض و من هالكلام
بس مع الوقت لاحظ انها ما قامت تسمع كلامه ... و كثر ما كان يقولها وخري عن الشباب الي وياج بالقسم تقوله مالك شغل هذي علاقاتي و لا تصير ملقوف وايد !!
لهجتها و اسلوبها تغيروا وايد معاه و لاحظ انها وايد قامت تمدح جابر جدامه واااااااايد أكثر كلامهم عنه و قامت تفصل من المسنجر بدون لا تقوله باااي أو شي و مسحت كل الكومنتس الي اهو دازهم لها بالهاي فايف !!
ليما على يوم جان يدش المسنجر ولا واصله ايميل منها
" حسين ترى بقولك شغلة و انت كيفك
انا ابيك تمسح الكومنتس الي بالهاي فايف و مابي اي شي يربطني انا وياك لأنه حجي الناس زايد هالأيام و الكل قام يتحجى عني أنا وياك و يقولون انتو تحبون بعض و انا بصراحة ما أحبك و مابي أي شي ممكن الناس تفهمه على أساس إني أحبك و بعدين حسين ما ابيك تجاملني وايد لانه ادري كل الكلام الي تقولياه مجاملات و حجيك الي قلته عن جابر كله غلط بغلط و انت كنت تقص علي و من اليوم و رايح مابي أي شي يربطني فيك أوكي !؟ "
جابر !! جابر الي كان يعيب عليها و يقولي انت ششايف فيها الحين صار يحبها !!! آه يا القهر ... جابر رفيجي الروح بالروح جذي يسوي وياي !!!!
و يوم عن يوم ينقهر زيادة و اهو يشوفها تقعد وياه بالكلية و اهي الي كانت ترفض انها تكلمه بالكلية لانها تخاف اخوها ايي الكلية يشوفها قاعده وياه و يطقها ,, و خواتها قامو يقعدون ويا جابر و يضحكون و يسولفون و اهم الي قالولها وخري عنه هذا واحد مو زين ..
و ظل على هالحالة مدة طويلة
ليما بيوم من الأيام و اهو ضايق خلقه جان يدش الهاي فايف علشان بيمسح البروفايل ماله ... ولا يشوف مسج واصله
" Hi ,,, liked your profile it's really nice ;) "
جان يرد عليها و يقولها
" thanx ,, will you add me on your MSN ? "
و قبلت انها تضيفه عالمسنجر ....... و إلى هنا نصل إلى نهاية الجزء الأول
To Be Continued :)
3 comments:
لووووووووول
اسلوبك حده يونس بالكتابه
امبي ناطرين البقيه
تدري احس انه دلال الي ضايفته
ولا لا اختها
ولا رفيجه مسوي نفسه بنيه
لووووول جنه بلشت اخوره بالتخمين
ناطرين و اسلوب حلو والله بالقصص
salamz dear...
احلى شي
ان اسلوبك جدا بسيط وجميل
ومافيه كلمات منمقه
بانتظار البقيه
وناااسة شكلها لجييين حبيت القصة وناطرة البقية :)
Post a Comment