بتاريخ 12-6 تخرجت من جامعة الكويت بعد رحلة خمس سنوات
حلو ,, طيب وين المشكلة ؟
المشكلة انه لازم الحين اييب الوظيفة !!
الوظيفة ,, صح صح صح ,, شنو الوظيفة ؟
حق ليش اتوظف ؟
حق شحقه ؟
جواب السؤال الأول حق ليش
لأنه الإعانة راح توقف لما اتخرج
و لأنه لازم ما اعيش عالة عالمجتمع
مش كده برضك ولا ايه ؟ ;P
جواب السؤال الثاني الي اهو حق شحقه
حق ايمع السته ألف سبعه ألف ثمانيه ألف الي امي قالتلي ايمعهم عشان تقبل انها تروح تطق بيبان الأوادم ;P
المهم
ببركتها جامعة الكويت تخلي الطالب قاعد عطالي بطالي من يتخرج لي بداية شهر 7 ;P
و انا صبرت ,, و نطرت ,, ليما دزولنا مسجات انه روحوا استلموا الشهادات
والله و جان اشيل شلايلي من هدية لي الشويخ و رحت و خذيت الشهادة
طيب بعدين شسوي فيها ؟
اوديها و اقدم على كل مكااااان !!
هذي الفكرة الشائعة عند كل حديثي التخرج ;Pp
انا ما تعجبني هالفكرة
رحت قدمت على البنك الوطني
بنك محترم و مرموق و الأكثر أماناً في المنطقة ,, جذي يقول الإعلان ;D
انا البنك الوطني كنت مقدم عليهم من قبل على اساس بارت تايم
ايييي خل اقولكم قصة البارت تايم ;P
اول مرة رحت هناك كنت مفرع ,, لابس دشداشة و نعال و عادي يعني شكلي شكل اي طالب مزرق من الجامعة و ياي يقدم و يرجع الجامعة
الحبيب الموظف مال شؤون الموظفين استقبلني بابتسامة عذبة
و قالي شوف احنا الحين ما عندنا شواغر " بس انت قدم اوراقك و انشالله خير " ,, حلو الكلام ؟
رحتله بعد يومييييييين بس ,, على ما طلعت صورة اصلية من شهادة الثانوية
مع العلم انه اكتشفت بعدين انهم يبون كوبي ,, ابيض و اسود
رحتله ,, و هالمرة كنت مغتر
جان ابتسمله و اقوله السلام عليكم انا بقدم اوراقي :D
جان يقابلني بنفس الإبتسامة العذبة و يقولي
" بس انا قلتلك ما عندنا شواغر :/ "
قلتله بس انت قلتلي اييب اوراقي ;S
جان يقولي انزين انزين ,, تعال عب الابليكيشن
عبيته خلصت جان يقولي اوكي انشالله ندق عليك
مادي ليش تهيألي انه اذا توظفت و بيعطوني معاش راح يقصون من معاشه !!
المهم انا لما رحت حق الوطني ولا ذاات الموظف صاحب الإبتسامة " العذبة " إياها
جان يقابلني بابتسامة من الشق لي الشق
و اخذ الاوراق كلها بابتسامة عذبة جداً !!
حتى انا شخصياً استغربت شفيه هذا ;Pp
و عبيت الابلكيشن و قالي انشالله باقرب فرصة ندق عليك
شوفوا يعني هالمرة كنت مفكر اني اتهاوش وياه بس شحلاته كان حليو و خوش آدمي فعشان جذي راح اكافئه و اسميه صاحب الابتسامة العذبة ;Pp
بس الوطني ما دقوا ;Pp
المكان الثاني الي قدمت عليه
وكالة الانباء الكويتية كونا ;D
رحت هناك و قدمت اوراقي بكل عنف و قوة ,, و عطوني رقم 1 بكشف امتحان الانجليزي
و الواسطة موجوده !!
يعني الوظيفة موجودة ;P
بس مادري ليش شفت يوم السبت الي بالورقة على اساس انه يوم الأثنين ;Pp
فراح علي الامتحان ;Pp
المكان الثالث وين ؟
شركة محمد حمود الشايع
شوفوا من الحين الي بيقولي بتشتغل بستاربكس ولا بتبيع دهن عود و هالسوالف خل يقط قطته بسرعة و يمشي لأنه سمعتها مليون مرة ;Pp
المهم خل اقولكم
الشايع حطيت السي في مالي بموقعهم اليوم
دقوا علي باجر !!
قلت الله اكبر الله اكبر @@
بهالسرعة الواحد يتوظف !!
المهم جان يقولولي تعال اليوم الفلاني الوقت الفلاني عندنا برنامج تعريفي عن الشركة و من خلاله تعرف شنو طبيعة المكان و كيفك عاد بعدين بتشتغل عندنا ولا لأ ;D
لاحظتوا ,, انته تختار مو احنا ;Pp
قلت حلو
جان اروح باليوم الموعود
حلقت ,, و تزقرت ,, و غترت
رحت هناك اشوف الناس كووول وايد ;D
حتى في واحد حاط ترجية بعينه ,,, حاب اوجهله تحية لا يفهمني غلط ;Pp
المهم يا جماعة الخير
و يعطونا برزنتيشن نص ساعة
بعدين جان تيي الأسئلة
محد سأل إلا انا و بنت ثانية
قلت حلو هالشي يعطيهم good impression ;P
بالبريك الي بالنص قبل المرحلة الثانية رحت هم سولفت مع مسؤولة الموظفين بالشايع كله ,, هم قالولي تفيد هالحركة
و بعدين جان يقطونا ب group exercise ;D
و ابدعت بهالشي ,, كنت انا الي ماسك القعدة ;P
و بالمقابلة الشخصية هم بذلت قصارى جهدي اني اترك لهم انطباع مميز
و خذيت كروتهم الشخصية ;D
و دزيتلهم Thank You Note ;D
يعني خلاااااص انا قاعد اسوي اشياء عمري ما سويتها ;P
و قالولي انشالله الاسبوع الياي ندق عليك
يمر الوقت , اسبوع ,, عشر ايام ,, محد دق
في اليوم الحادي عشر و انا توني قاعد من النوم
ولا اشوف عندي مسد كول
ادق عليه ولا موظفة بالشايع تقولي بالحرف
" sorry we couldn't find you a position in Al-Shaya , because you wanted to work in a place that allows you to get in touch with people , unfortunately we don't have such position right now ,, BBye "
انزين ليش داقة خو ادري ما قبلتوني يعني الا تسمعيني هالكلمتين ;P
و بالأخير جان ارجع لقواعدي و شغلت واسطاتي و حصلت وظيفة ببنك طوييييييييييييييييييييييييل ;D
و بس خلصت انشالله ناطرهم يدقون علي يقولولي الدورة متى بشهر 9 ;D
اي و في نقطة مهمة ,, ما قدمت عالديوان
و اشوه اني ما قدمت ,, لأنه في وحده ما تتسماش قدمت عالديوان و انقبلت و راح تصير مدرسة فاحسن عشان لا اصير موجه عليها باجر عقب باجر و اخسف بأهل ام(ن) يابتها ;Pp
شفتوا شكثر انا طيب و ما احب أذية الناس ;Pp
و رمــــــضــــان كـــــريــــــم
و هذا البوست برعاية الحلوة الي فوق ;D
أحد يشرحلي ليش كانوا يحطولنا هالاغنية بالروضة :/
