Wednesday, January 27, 2010

Co-Education

اخخخخخخخخخخخخخخخخخخخخخخخخخخخ ;Pp
موضوع طويل و متشعب مع انه بسييييييييييييييييط جداً
و لكن
يأبى البعض الا انهم يطلعون بفناتق ما ينعرف قرعة ابوها منين !!
أول أمسات ,, لقيت موضوع بمنتدى يتكلم عن انت يا ,, الاختلاط !
الحين شنو الموضة عن المنتمين للتيارات الاسلامية
" أمريكا تتجه لفصل التعليم المختلط "
فاذا أمريكا رب الأرباب تبي تفصل التعليم ,, انتوا يا التماسيح بالكويت شعندكم تطالبون فيه هااا ؟ ;S
و طلعوا بموقع يديد ,, فد شي عجيييب غرييييب
هالموقع أمريكي ,, عشان جذي لازم انتوا يا دعاة الاختلاط تندك حناككم و ما تعودوا تحكوا طاول طاول !!
أنا تعوذت من ابليس
و دشيت الموقع
لقيت الموقع فيه اعلانات عن انشطتهم و مطالباتهم و اسامي المدارس المنفصله
و شنو سبب قيامهم بهالحملات و من هالحجي
طبعاً مما قرأته انه الحملة موجهة لمدارس التعليم الاولي , أو تعليم ما قبل الجامعة
و نقطتهم انه بعمر المراهقة الستيريو تايب يطغى على تفكير الصبيان و البنات ,, فهالشي يحد من قدراتهم بشكل أو بآخر
طبعاً حتى اهم ما عندهم حجة سنعة مثل ربعنا
لكني فتلت الموقع و دورت فيه لين طاح تري ,, أبي القى كلمة تدل على الرغبات الجنسية الدفينة و الزنا و الايدز و مش عارف ايش
عبث!
ما لقيت ولا شي
فجان ارجع حق المنتدى
و قلت حق صاحبنا الاسلامي ,,
قلتله يخووي ترى ماكو شي يدعم حجتكم الجنسية
جان يتكلم عن اللغة العربية
و انه خريجين المدارس الخاصة ما يعرفون يتحجون عربي ,, و هل يجوز هذا الشيء و احنا في بلد اسلامي انهم ما يعرفون لغة القرآن !!
ثم دخل موضوع الأسر المحافظة و انه اكو اسر ما ترضى انه بناتها تدرس بهالمواد المختلطة !!
و النضوج العقلي ,, و انه شلون تثبت عمر الانسان الناضج عقلياً ,, انا اقدر اييبلك بو 7 سنين ناضج و بو 18 سنة غير ناضج و دراسات و مش عارف ايش
لاحظتوا انه ماكو أي دليل مادي قوي يستند عليه في دعم موضوع الفصل بين الجنسين بالتعليم الجامعي ؟؟
انا بعرف هالاسلاميين شيبون ؟؟
يعني ماني خابر الحركات الاسلامية بالكويت لها دور فعال بنهضة الكويت ,, على العكس اهم لما وصلوا لي السلطة كتيارات اسلامو-سياسية الديرة صارت من ردي لأردى و صار كل شي ممنوع و كل شي حرام و كل شي لازم بالأول نحطه على مسطرة الدين لو كان انشالله بحجم راس الدبوس
فهل هو مجرد تمسك بالقشور و ايجاد للحجة أمام الخالق على حساب الخلق ؟
أم انها مجرد عصبية غير مبررة لقوانين ناقصة ذات مذكرة تفسيرية تحمر وجنتا العاهرة منها خجلاً ؟
أم ماذا ؟؟
أم ماذا ؟؟
يا حلوين ,, يا طعمين ,, يا نحبكون
كفاية ,, حرام عليكم
بتحافظون على الفضيلة بالمجتمع و تودون الحد من انتشار الجنس مع العلم انه ماكو ناس مهووسة بالجنس مثلكم
تبون تحافظون على الأخلاق
يا عزيزي انت وياه الأخلاق لا تدرس ولا يحافظ عليها أحد
الأخلاق نبتة تروى بماء المكرمات
و هالمكرمات ماهي محكورة عليكم ,, اكو ناس غير مسلمين ,, مو مسلمين ليبرالين ,, لأ غير مسلمين ,, و اخلاقهم افضل من اخلاق بعض المسلمين ,, لا بل اقول غالبية المسلمين لأنه احنا لو عندنا اخلاق جان ديرنا مو من اوصخ الديّر بالعالم
اوف ,, محد يرفع الضغط و السكر غير العربي و الاسلاميين بهالديرة ;@
*****
باجر رايح ايران
سفرة شاقة من خميس لي خميس ,, بس شسوي ماكو غير هالسفرة
ما تبون شي من هناك صح ؟ ;Pp

Saturday, January 23, 2010

The Polish Girl !!





دام انه ماكو سالفة و موضوع اكتبه من فترة ,, قررت اليوم اقولكم سالفة البولندية الي لاحقتني بلندن ;Pp




طبعاً اول ما نطري بنات أوروبا ,, و بالتحديد أوروبا الشرقية يطري على بالنا هالنوع من الجمال الأخاذ و الشقار الي يكسر العين و العيون الي الواحد يغرق ببحرها ,, انزين خل اوقف الوصف قبل لا اغرز بعدين شيطلعني ;Pp

هذا ال stereo-type الي عندنا عن بنات هالمنطقة

الله يسلمكم بسنة 2005 قبل لا ادش الجامعة رحت مخيم كشافة بلندن

طبعاً مخيمات اوروبا تكون " مشتركة " شباب و بنوتات ;D

المهم مالكم بالطويلة

بيوم من الأيام ,, كنا رايحين نشاط خارجي ,, كنوع من خدمة المجتمع

فاحنا قطونا بمنطقة قريبة و قالولنا صبغوا الرصيفين الي بهالمنقطة لانهم متهردقين

انا صبغت و خلصت ,, بهالمكان كانوا ويانا منو ؟ الوفد الايطالي

يا لبى قلبه الوفد الايطالي ;$

المهههههههم ;p

عاد بهالمنطقة دشيت الكنيسة هناك لانه كنا نبي ماي و شربت من المياه المباركة مالتهم ,, يكون صج يعني ,, بس ما رحت المذبح و اشعلت شمعة ,, شكلي بسويها المرة الياية ;Pp

المهم بعدين جان نروح نقطة التجمع مالتنا ,, ننطر الباص الي بيودينا Hylands Park

و انا ناطر و منسدح استمتع بشمس يوليو في انجلترا

و اذا بي اسمع صوت وحده ,, انا قدرت اميز انه صوت انثى لكن صج الصوت يخدع يا جماعة ;Pp

لفيت ويهي

جان اقول لا شعورياً ,, سلام قول من رب رحيم ;Pp

يثلة ,, انا اطلع عندها فطفوط بو ست سنين !

الشعر فلاااافل تقولون السيم مال المواعين !

و الويه ابييييييييييييييض تقولون مغسولة بتايد !!

و تهذر و تهذر و تهذر و تهذر

ما سكتت

شوي تسولف عن بولندا ,, شوي تسولف عن ابوها

شوي تسولف عن لما راحت مصر و ابوها هناك عصب و قالها المصاروة ميانين

الطامة الكبرى لما قالتلي ابي ايي الكويت ,, و ابيك تزورني معالم الكويت السياحية !!

و طبعاً الربع وراي مو بس شماتة ,, الا صاروا يضحكون جنهم زهيوية ;Pp

طبعاً انا للحين ما ادري شطولها

اول ما لمحنا زول الباص مقرب جان على طووووووووووووول اشيل قشي و اوقف أول واحد ;Pp

ركبنا الباص جان تيي تركب جدامي !!

شتبييييييييييييييييييييييييييييييييييييييين :@

الحين انا بتخلص منها شلون ,, شالحيلة

جان اقول حق الشباب اول ما اقرب من المخيم بنزل اول واحد من الباص و بمشي بسرعة بسرعة ,, انتوا ان شفتوها وخرت قولولي وقققققققققققف ,, اوكي ,, اوكي

و اول ما انزل من الباص امشيلكم مشية البطة مالت الاولمبياد و انطر الحين يقولولي وقف ,, الحين يقولولي وقف ,, ماكو

لفيت ويهي بالغلط جان يقولولي لاااااا تلف لاحقتك ,, ما كملت اللفة جان ارد اكمل طريجي ;Pp

ليما بعدين اكتشفت ان الملاعين قاعدين يضحكون علي شلون منحاش منها ;Pp

لزقة العنت خيرها :@

بس انا قلتلكم للحين ما شفتها بالطول

على آخر المخيم قررنا نبيع الخيام الي عندنا

جان ايي الوفد البولندي بيشتريهم ,, ولا الاخت وياهم

هالني ما رأيت @@

لو اسوي شعري سبايكي ,, يمكن يمكن يمكن ,, اشطف على مستوى صدرها ,, يمكن مو أكيد @@

طبعاً اهو كان في وحده ثانية بهالمستوى من الطول بمخيم فنلندا ,, بس هذيج اسمها نادية و حلوة جنها شارابوفا ;D

لكن هذي @@

مأساااااااااااااااااااااااة

ادعوا العزيز القدير انه ينجيكم من شر البولنديات قولوا آمين ;Pp



Thursday, January 7, 2010

Happy 22 Me ;$


أجمل ما يمكن حدوثه هو أن تتلقى أخباراً سارة في يوم عيد ميلادك
شعور لا يوصف!
=D


Tuesday, January 5, 2010

الأعراس المختلطة !

منو فيكم شاف موضوع الأعراس المختلطة الي حطته العفن أمس بتاريخ 4-1-2010 !!
WoOoOoOoOoOoOoOoOoOoOoOoW
يعني جنه ما بقى شي بالديرة
خلصت القضايا السياسية
ماكو مشاكل اجتماعية
ماكو اي شي
الا ظاهرة العروس المختلطة !!
توه توه قبل شوي شفت هالموضوع مطروح بمنتدى
طبعاً العموووووم
يالله لا تبلانا
و اللهم عافينا
و انتشرت الدياثة
و الله يستر علينا و ما ننخسف
و ما يجوز هالحجي احنا بديرة محافظة
و هالحجي الفاضي كلللللله الي ماله طعم
انا بكل بساطة قلتلهم انه مالكم حق تتدخلون بهالموضوع ,, يعني دام الاطراف كلها راضية انتوا شتبوون ؟؟
خو هالعروس ما ينحطلها دعوة عامة عند الدواوير !!
و طبعاً لازم " شرفاء روما " الي يقضون عطلهم بالقاهرة و تايلند اييون و يستعرضون شرفهم بمثل هالمواضيع و انه احنا الي ما نرضى و مش عارف ايش
جان يقولي واحد من هالروماويين
انه احنا ببلد فيه قبايل و عوائل محافظة
لاحظتوا ؟؟
قبايل و عوايل محافظة
هذولي شمال امهم داشين بعروس الاوادم !!
لا يعني انا ما احب هالعروس ولا افكر اني اسوي عرس بهالطريقة
بس اذا الناس عاجبهم
انتوا شكو !!
و جان ينطلي الحبيب مرة ثانية يقولي انت ما تخاف من عقاب ربك شي جذي
يا حبييييييييبيييييييييييييييي !!
قلتله انت دام وايد هامك هالموضوع لا تحاتيه دام حسابي عند ربي ,, و بعدين هالشي من اختصاصات الله ما اعتقد تبي تتدخل بهالنوع من الاختصاصات ؟؟
و من وراها ما دشيت هالموضوع لأني لو محاجي مزهرية ترسها صبار صناعي جان فهمت
بس والله ,, الله يستر علينا مو من هالجم عرس المختلط ,, الله يستر علينا من هالناس الي ما زالت تفكر بعقلية العصر الطباشيري !!
افففففففففففففففف حرني :@