دولة الصيدات !!

والله لو ماجدة الرومي تدري انه الكويت بتصير جذي جان ما غنت هالاغنية بالمرة

بوستي هذا بكتبه من الحرة على عقلية المواطن الكويتي

المواطن الكويتي غبي

بالفعل

المواطن الكويتي عاطفي لدرجة انه عاطفيته تخليه أثول

إييييي نعم أقولها ,, المواطن الكويتي يثول نفسه بنفسه

شوارع مثل الناس ماكو

طريج الملك فهد و حتى الملك فحيحيل ,, من أيام حملة طارق ابن زياد و هذولي اهم ما تغيروا

للحين مكسرة الشوارع و قد ما يعدلون فيها تتكسر بعد يومين

شمعناته هالشي ؟؟ معناته من الاساس مو قاعدين يعدلونهم

قاعدين يرهمونهم و بس ,, بالله هذا حجي

,,

الكهربا تنقطع كل يوم ببعض المناطق

لا صيانة يسوون مثل الناس

لا يشترون مولدات يديدة ,, و مو قاعد اتكلم عن مولدات المانية صارلها 40 سنة يستخدمونها ,, لا لا أتكلم عن مولدات يديدة بقراطيسها ,, خلنج على قولة السوريين

و هالمولدات وجدت لكي لا تعمل !!

و بعدين يقولولنا رشدوا

والله لآبوكم لابو ترشيدكم فوقكم :@

,,

المستشفيات ,, مبارك و العدان و الفروانية و الجهراء و غيرها

لو يشيلون مسميات " مستشفى " من عليها و يحطون بدالها كلمة مسلخ وااااايد احسن

منها يكونون صريحين مع الناس و يبرون ذمتهم جدام خالقهم

منها الناس تعرف وين رايحة

و بالاخير ايي واحد يقولي مستشفيات الكويت ماااكو منهاااا و بعهدي يبت معدات ماكو مثلها ,, والله امس دشيت مستشفى بالصباح ,, الله وكيلكم سجن مو مستشفى ,, خفت ادش الغرف يا جماعة اشكالها جنها غرف تعذيب !!

,,

طبعاً كلكم الحين تدرون عن سالفة المسرحين ,, الله يعينهم انشالله و يخلصهم من بلواهم ,, لا و يقولولهم تحدوا ,, يا عمي أي تحدي أي بطيييخ

,,

طبعاً في حال استمرار هالتجاهل لمطالب الشعب ,, الي على فكرة الشعب مساند الحكومة فيها و اوضحلكم شلون بعد شوي

شراح يصير على المدى البعيد ؟؟ اقولكم

مشكلة طاقة ما راح تنحل

بطالة واضحة هالمرة مو مقنعة !!

الشعب راح يموت حر

ماكو واردات ,, لأنه نفطكم الي مستانسين فيه راح يخلص

و انتوا اساساً ما عندكم غيره

و غيره و غيره و غيره

سياسة عين عذاري الي تتبعها الحكومة راح تخليكم اخس من الشام بعهد الدولة العثمانية و راح تشوفون

,, طبعاً انا للحين ما قلتلكم شلون المواطن الكويتي يساعد الحكومة بهالشي

المواطن الكويتي للحين يسبح بحمد ال50 دينار مالت كل طفل

الخمسين الي لو الطفل يدري عنها جان ردها حق الحكومة

بدل الايجار ,, والله الله يجزاها خير الحكومة حتى ايجارنا تدفعه

أقول قم بس قم ,, بدل الايجار هذا حتى غرفة و حمام ما اييبلك هالايام

الدولة متكفلة بتعليمك ,, هذي انا اشهد لهم فيها بس تخبطاتهم فيها والله حتى البعارين الي راسهم هالكبر ما يشيلونها

ديرتك تعطيك 4000 دينار وقت الزواج ,, اقول شلووونك ,, شخباااارك ,, عساااك بخير ؟ مرتاح انشالله ,, أمورك طيبة

ديرتك تهتم بعلاجك و اذا ماكو علاج بالديرة تدزك لاحسن المستشفيات بره ,,, مينون الي يحجي و أهبل الي يصدق هالكلام !!

ديرتك موفرتلك سكن ,,, ايييي بعد ما تطلع روحي و انا انطره و بالاخير معطينياه بقلعة وادرين :)

ديرتك مخفضة مصاريف الكهربا و الماي الي انت تدفع فواتيرهم الزهيدة و انت تضحك ,, اقول يا الاخو ,, ترى قامت تنقطع بدون سابق انذار :)

ديرتك تعطيك 70 ألف لما بتبني بيت ,,, اعنبو ,, مو قاعد اردها لهم ؟؟ !!

ديرتك تحفظلك فلوسك بالتأمينات و تردها لك بعد التقاعد ,, أخاف احجي و عليَ الناس يقولون :@

ديرتك تهتم فيك بحياتك و بعد ما تموت حافظتلك مكانك الي تندفن فيه و موفرتلك اياه ,, حتى بهذي لازم نشكر الدولة !!!

شفتوا شلون المواطن الكويتي أثول

عباله لما يقول هالاشياء ,, فاهو انسان وطني و مثال حي للمرحومة جان دارك !!

بالعكس إبني

هذا إن دل فإنه يدل على انه المواطن الكويتي ضربت فيوزات مخه :)

هذا و أسأل الله المغفرة لي و لكم و السلام عليكم و رحمة الله و بركاته

محدثكم

Don Juan