Banker's Diaries - EP01

التاريخ : 9-1-2011

الوقت : الساعه 11:17 صباحاً

المكان : المكتب الرئيسي - قسم التدريب

" سلام عليكم ,, شلونكم ,, شوفوا الي نجحوا باختبار الاسبوع الي طاف بس 8 ,, الي نجحوا باجر ما راح يداومون هني اما الباجين لازم يكملون الدورة اوكي ,, الي يسمعون اسمهم يروحون مكتبي عشان اقولهم بأي فرع راح يشتغلون "

هنا ابتدأ المشوار

اختاروني بفرع المطار , الكل يمدحه , فرع عجيب , بالفعل , فرع عجيييب

اليوم الي وراه رحت من صباح الله خير و دقيت سيارتي سلف و توجهت الى المطار

وصلت الفرع ولا الشتر نازل ,, قلت طبيعي اكيد بيفتحون 8:30

ولا اشوف اثنين داخل ,, اشرولي انه دش من تحت الشتر

دشيت عادي جان يقولولي " انت منو ؟ "

جان اقولهم

" أنـــــا الــــمـــوظـــف الـــيديـــــد :D "

المهم بهذاك اليوم الوضع كان عادي ,, ما خلوني اجيس شي

بس سويت جم معاملة بسيطة

خلوني امسك شوية ربطات عشان ايدي تاخذ عليهم ;p

اكتشفت بعدين ان هالشي جداً مهم خصوصاً حق الي بيشتغلون بالكاش ,, لأنه صج منظر الفلوس يخرع ;p

اول يوم الموظفة الي كانت تدربني شحلاتها شزينها معاي

أخذت بيدي على قولتهم

ثاني يوم يت دايخة ,, مالها خلق نفسها ,, زين ما كفختني بالكيبورد ;p

اشوه انه كان هذا آخر يوم لها بالفرع ;Pp

طبعاً اكتشفت انه عندي ثلاث مشرفين ,, لأنه مافي ولا مدير فرع بفرعنا ,, كلهم مدراء عمليات على قولتهم

اليوم الأول عدى على خير

و كان الريوق كرواسون من سينابون ,, لظيظ جداً

اليوم الثاني كان مدير غير!

مدير عسر

عسارته مو على سنع

عسارته نابعة من خوفه

طبعاً سبب خوفه كل البنك يعرفه , بلا استثناء

و لكن مابي اقرض بالريال ,, بس الله يهديه و يعطيه شوية جرأة ;p

المهم

انا كنت اسولف و يحذوني الامل بمستقبل مشرق بالبنك و كنت اقولهم اني ابي اصير Dealer

مو الديلر مال الكازينو لا لا انسان محترم و ذو قيمة و فائدة في القطاع المصرفي

و العموم كان يضحك , مادري ليش

ثالث يوم , المدير كان كويتي

ما كان يضحك

جامد معاي

ناشف أوي ;p

بس كنت ادري انه حبيب ,, و بالفعل بعد فترة لما خذينا على بعض بالشغل طلع خوش وليد ;D

طبعاً أهم شي اني قام اقول عنه خوش وليد و أنا أصغر واحد بالفرع ;Pp

اييي نسيت اقولكم

ثاني يوم كان الريوق فطاير

و للفطاير قصص ,, بسبة الفرع و الدوام حبيت الفطير المشلتت بالجبنة المالحة

يااااا ربااااااه

ايام الدورة شحلاتي كل يوم انا و صديقاتي الكشخة ,, اقصد اصدقائي الكشخة نروح ستاربكس البورصة ,, و حتى الي يشتغل هناك قام يزهب الهوت تشوكليت من اول ما يلمح زولي يتخطرف << معروف عنك ريم الفلا ;p

بالمطار كان الوضع غير

اشي فطاير و اشي مشلتت و اشي كرواسون ,, الكرواسون هذا كان خفايف ,, تصبيرة ;Pp

طبعاً اول اسبوع ما كان عندي يوزر ولا شي فكنت مثل المشلول ,, قاعد لا شغلة ولا مشغلة غير اراقب و اتعلم

و لكن الاكشن كله يبدى من الاسبوع الثاني

و هذا ما سوف نراه في الحلقة القادمة من مغامرات دون جوان في البنك ;D