ما يثير استغرابي !

انا واحد من الناس ما احب اكتب عن السياسة

احب اسولف فيها ,, احب اتناقش فيها

لكن اكتب عنها مواضيع و مقالات ,, لأ ماني من هالنوع

حتى توجهي السياسي طول عمري ظليت محتفظ فيه لنفسي و ما كنت اجبر الناس انهم يوافقوني عليه لأنه باختصار توجهي الي انا اشوفه صح

ولدت لأب و أم كويتيين من المذهب الشيعي

و العايلة تقريباً بكاملها محافظة بمافيهم بيتنا

لكن ابوي كان ديمقراطي جداً معانا

لكن هم ما اغفل الجانب الديني فينا و لكن ما غرس فينا مسألة العداء مع السنة ,, على العكس ,, الوالد كان يثقفنا عشان نعرف تاريخ الأمة الإسلامية الاسود في غالبيته

الوالدة جاهدت وايد معاي و تحملت كل بلاويي و تحملت انها دخلتني مع شباب الغدير سنتين و بالسنتين كنت ما اطول اكثر من شهر و اطلع من الدوة ;Pp

كبرت

تخرجت من الثانوية

دشيت الجامعة

مجتمع يديد

مجتمع متنوع و مختلط و كوكتيل غير متجانس من الافكار و الاجناس تلقى فيه

انا من البداية ما كان عندي الشعور بالانتماء الحلزوني للمذهب

كنت أشوف انه قوة المجتمع بوحدته و بقيمه الحرة

يعني بالمختصر ما دشيت اسلامية دشيت الوسط الديمقراطي ;D

انا دشيت الجامعة ,, و الحمدلله اني دخلتها بفترة زمنية انه من اول سنة لي بالجامعة لي آخر سنة و الديرة تطبخ و انا احمد الله على هالشي لأني شاهد على الوضع داخل الجامعة

انا دخلت الجامعة و بصيفية أول سنة صارت حملة نبيها خمس

قمة الحماس

نبيها خمس !!

احنا ضد الحكومة و ضد ذيول الحكومة

الي شبكنا يخلصنا

احنا بتوعك يا زعيم

و غيرها من الشعارات الي ما بقى منها الا آخر واحد و شكله بيذهب أدراج الرياح

و انتصرت ارادة الأمة

ما تتصورون شكثر كانت فرحتي و انا اشوف جماعة الخمس يكتسحون الدوائر و المد البرتقالي شسوى بالكويت

ما تتصورون شكثر كانت فرحتي و انا اشوف ابوي يوقف مع عبدالله الرومي و يسنقل له الصوت

حسيت يومها انه صج الفوارق المذهبية ذااابت بالكويت

كلنا ايد وحدة و قلب واحد

سنة شيعة ليبرال اخوان ,,, الخ

كلهم صاروا ايد وحدة !

هالمجلس شنو الي حله ؟

تذكرون صح

الــــــتـــــأبــــــيــــــــن !

تذكرون بالتأبين شصار

انا واحد ليبرالي و ماني من جماعة السيد ,, مع اني كنت احبه لأنه من اصوات المعارضة الي محد يختلف عليها سابقاً ,, لكن الزمن غدار

الي صار اني ما كنت مع التأبين ,, انا التأبين ما أأيده و قلت هالشي حق ابوي

لكن الي حدث كان مو طبيعي

كلكم تذكرون شصار

التخوين كان داير على ودنه

و العموم داس ببطن الوحدة الوطنية بسبب و بدون سبب ,, و كانو يرقعونها بكلمة نحن لا نقصد كل الشيعة

وصلت انه نواب الأمة للأسف كانوا ينادون بتسفير الكويتيين " من أصول فارسية " !!

و غير موضوع سحب الجناسي و الطرد و هالعلاك المصدي كله

و كتلة العمل الشعبي سقطت بالفخ و بكامل ارادتها المسلوبة و باقتدااااار و مع مرتبة الشرف

و هالبوست قاعد اكتبه بسبة واحد من كتلة العمل الشعبي

و نعم لولا تدخل العقلاء ,, و على رأسهم " جاسم محمد الخرافي " ,, إي نعم جاسم الخرافي

جان الله العالم شصار !!

لأنه الوضع كان جداً مقيت و كريه ,, لدرجة انه اعضاء بمجلس الامة ما يستحقون التفاتة من الناس صاروا اهم الأبطال و اهم الوحوش و اقدع من كده مفيش

و غير طبعاً سالفة طرد أحمد لاري و عدنان عبدالصمد من كتلة العمل الشعبي ,, و دموع التماسيح الي ذرفها مسلم البراك يوم اعلان هالبيان

كل هالامور هذي بالنهاية أدت لحل المجلس و انتخبنا مجلس 2008

طبعاً الموضوع الداير بمجلس 2008 كان المزدوجين

و الي فتح هالموضوع النائب السابق أحمد المليفي

و بعد سالفة المزدوجين طلعت سالفة المصروفات و انحل المجلس و دعينا لانتخاب مجلس 2009

لكن شنو صار بانتخابات 2009 ؟؟

طلعتلنا ظاهرة الجويهل

الجويهل انسان لسانه زفر ,, و فالت بآن واحِد

لكن الي قاعد يتكلم فيه حقائق ,, اي نعم حقائق و موثقة بسجلات

شلون يابها هذا موضوع ثاني

لكن الموضوع الي انا بتكلم فيه

اليوم شفت فلم " المظاهرة الجماهيرية " الي انطلقت من ديوان البراك الى مادري وين

حقيقة

راااااااااااااعني ما رأيت !

الحين صرتوا تخافون عالوحدة الوطنية !!

وين كان خوفكم عالوحدة الوطنية يومها

انا مو قاعد اتكلم من منطلق اني شيعي ,, لا لا لا أبداً أبداً أبداً

لكن مسألة انكم تحشدون الحشود

و تحشدونها مو بدافع وطني ,, لكن مدفوعين بانتمائهم القبلي و انتم تدرون بهالشي لأنهم تيمعوا من قبل عند أمن الدولة ,, لأسباب مال امها علاقة بالوحدة الوطنية :)

و تظهرون خوفكم عالوحدة الوطنية و النسيج الواحد و هالامور هذي كلها ,, وين كانت قبل ؟

لا تقولون ذاك يوم و هذا يوم

نفس الشي

ماني متكلم عن شموع البراك و مسيراته الحاشدة و كلامه الي يضاهي كلام الجويهل في سوءه

ولا بتكلم عن العم أحمد السعدون لأني ما زلت احبه رغم انه شفط على ابو خامس التيار" الوطني " و قام يخاف على مشاعر ابناء الرابعة و الخامسة

لكن الي باط جبدي صج

محمد الخليفة !!

ياخي انت ما خليت حجوة بقلبك ما قلتها بذيج الايام ولا راعيت نسيج وطني ولا بطيخ مبسمر ,, هسه جاي تسويلي بيها سبع ؟

لك اي روحوا عنااا يااااااااا

التكتل الشعبي سقط بالاختبار ,, و باقتداااااااار

ان كنتوا ناسين مواقفكم التاريخ ما ينساها لما طحتوا بالفخ الي نصبته لكم جريدة الوطن و توابعها :)

هاردلك شعبي ,, يمكن بيوم من الايام نقولكم قودلك ,, بس ما اتوقع انه هاليوم قريب :)