Imagine ..

تخيل معاي

شخص

بلا هوية محددة

توه ياي من الدوام

و يا دوبك فتح باب شقته

و قط الجاكيت على القنفة

و راح صوب البلكونة

يبي يرتاح من تعب يوم عمل شاق

و توه مصلح فنجان قهوة تركية يعدل فيه مزاجه

و رايح صوب البلكونه

يتأمل المكان الي عايش فيه

و بينما اهو قاعد يتأمل

يسمع صوت

صوت طيور

لكنها طيور ما تييب معاها الا الموت

صوت مقاتلات حربية !

لحظات طويلة تمر عليك

و انت تشوف هالمقاتلات ياية صوبك

يقطع هالسرحان صوت انفجار بأول الشارع

انفجار ثاني

جدامك قاعد تشوف اروع عرض للالعاب النارية

لكنها ألعاب نارية مميتة

نزلت جسمك

انخشيت ورى الجدار البسيط الي بالبلكونه

عمارتك قاعده تهتز من اصوات الطيارات و الانفجارات

ما تدري شتسوي

تصكر اذنك ولا تحمي جسمك ولا تنجو بنفسك

عدة افكار

كلها تييلك مثل الموجة بوقت واحد

ما يقطعها الا سماعك صوت القذايف و اهي تحوش العمارة الي يمك

بهالساعة تقرر انك لازم تنجو بنفسك لانه ممكن عمارتك تكون التالية

بسرعه توصل نفسك لمخرج الطواري بالعمارة

و بعد ما تطلع من العمارة بمسافة بسيطة تسمع صوت انفجار

كان هالصوت انفجار عمارتك

و انت بمكانك واقف

ما تدري وين تروح

وين تولي

كان آخر شي تسمعه صوت انفجار مبنى يمك

و غمضت عينك

..

..

..

..

..

..

..

..

..

فتحت عينك مرة ثانية

" حالته مو خطيرة خلوه يمشي ييبو غيره "

تشوف ولا انت بالمستشفى

و ايدك و راسك ملفوفين لكنك تقدر تمشي

عشان جذي مشوك لان في غيرك بيموتون

تطلع من المستشفى

الشوارع مزدحمة

و الناس هايجة و ما تدري وين تروح

فجأة يقطع حبل أفكارك منظر

" ضيعان شبابك يا حبيبي "

" ما كان يومك يا ابني "

" منكم لله يا كلاب ان كان حرقتوا قلبي "

تبجي

اي نعم يحقلك تبجي و انت تشوف هالثكلى جدامك

تبجي و نوح على ولدها ابو اربع تعش الي خسرته بالغارة الجوية

و تكمل طريجك مثل السكران

ما تدري وين تروح

اييييي

خل ادق على بيتنا اشوف وينهم شصار عليهم

اقرب تلفون عمومي

" ألوو ,, ألووو ,, "

" منو ,, حسن ,, انت عايش "

" اي انا عايش انتوا شلونكم "

" اخوانك ماتوا يا حسن ,, اخوانك ماتوا بالغارة يا حسن "

و تطيح السماعة من ايدك

و انت بكبرك تطيح

صدمة

محد يقدر يتحملها

جثث

أشلاء

خراب

ناس منحاشين

ناس تايهين

حرايق بكل صوب

و انفجارات اربعة و عشرين ساعة

..

..

..

..

..

الحين تخيل هالشي قاعد يصيرلك ,, بالكويت

لا تقولون هذولي خونة

لا تقولون هذولي يسبونا

لا تقولون هذولي ذبحونا بالغزو

ما اقولكم انسوا الغزو لا والله ما ننساه

لكن اذا احنا بسبع اشهر احتلال قبل ما يقارب العشرين سنة

و للحين في ناس يرفضون يساعدونهم بل و البعض يقول خل الاطفال يموتون هذولي باجر يكبرون و يصيرون نفسهم

فما بالكم باللي من ال 48 ,, و اهم يعانون من الخيانة :(

حسوا فيهم ,, ساعدوهم

و تذكروا انه الرسول (ص) قال : من أصبح و لم يهتم بأمر المسلمين فليس منهم

لا نكون حقودين

انتوا مو تقولون الغرب اهم المتطورين

ترى اهم مو بس متطورين بالتكنولوجيا

ما تقدرون تواكبونهم بالتكنولوجيا واكبوهم بالأخلاق

و انتم امة من بعث ليتمم مكارم الأخلاق

ترى والله ,, والله

الي بين الكويت و بين العراق مو بس فلسطين

ما يعادل شي لما بنقارنه باللي بين أوروبا كلها و المانيا

و ما راح يقارن بالي بين أمريكا و اليابان

البيت لنا ,, و القدس لنا ,, و بأيدينا سنعيد بهاء القدس :)