أول مباراة !!

بمناسبة انه باجر مباراة الديربي بين العربي و الكودري و بمناسبة اني وايد متحمس لاني من زماااان مو رايح مباراة

اهو في شي غير بملاعبنا

صج انه المدرجات مغبرة

و الملاعب جنها راس واحد حايشته ثعلبة

و اللواعيب الله بالخير

بس أحس شي يمشي ويانا بالدم انه نحب مباريات دورينا ,, خصوصاً العربي و القادسية ;D

أتذكر انه أول مباراة رحتها بحياتي كانت نهائي كاس الأمير بين العربي و الساحل

أيامها ما كنت أدري عن شي اسمه كرة خارج حدود الخليج العربي ;Pp

غير انه كل 4 سنين في شي اسمه كاس العالم و ما كنت أحبه لأن الكويت ما تدش فيه ;Pp

المهم نرجع لمحور حديثنا

اذكر انه يومها لما رديت من المدرسة جان امي تقولي اليوم المغرب بوديك الدعية هناك في مفاجأة لك

قلتها شنو المفاجأة ؟؟

جان تقولي بتروح مع عمو عدنان المباراة !!

انا ويهي صار جذي xD

المهم عالعصاري جذي جان امي تقولي روح اسبح ,, رحت سبحت و خلصت

جان تلبسني ملابس جني رايح غدى العيد مو مباراة ;D

و قعدت طول الطريج تقولي لما تروح هناك قول حق عمو عدنان مشكور و مو تأذيه و و و و و و ;D

المهم وصلنا هناك ,, جان اشوف بالتلفزيون ولا بادية المباراة قاعدين يعزفون السلام الوطني !

عمو عدنان وينه ؟

بالمناسبة عمو عدنان ولد عمي بس لأنه أكبر مني بعشرين سنة فصار أهو أصغر عمامي ;D

المهم شوي جان يبين عمو عدنان و يقولي يلا بنروح المباراة ,, قلتله يمدي ؟

جان يقولي مالك شغل نوصل نوصل ;Pp

والله و يصير نيد فور سبيد بالشارع ;D

المهم وصلنا

ولا نشوف أشكال ما أنزل الله بها من سلطان ياية تشجع نادي الساحل العظيم ;Pp

المهم يينا الحين بندور دخلة ,, ولا ماكو إلا باب واحد مفتوح و صاير ورى القول و الدوس كله على هالباب

و زحمة

و صكة جتوف

و انا كنت وقتها توني طفل ;Pp

المهم و اسمع مال الشرطة يقول " يا جماعة روحوا البوابة الثانية فتحوا الباب "

و الناس تصارخ لأ إلا نبي نمر من هني ,, أثري هذي خدعة من الشرطة عشان يطشرون الناس ;D

المهم انا من الخنقة قلت حق عمو عدنان ,, خل نسمع كلامهم و نروح هناك ,, جان يقولي انت اسكت مالك شغل ;Pp

والله و جان ايرني بين الناس و صعدنا فوق ,, أثري بعدين اكتشفت انه انا كنت واسطته ;Pp

المهم

لما اشوف المباراة الحين اكتشف انه كانت بقمة السخافة و السقالة ;Pp

بس انا كنت مستاااااااااااااااااااااااااااانس

و لما العربي حطوا القول الأول ,, يا اللللله ما الذي يحدث ,, ماهذا يا العربي ,, كنت اصفق بطريقة غبية ;Pp

و لما الساحل حطوا التعادل تحبطططططططططت

ليما آخر دقيقة و ولد عمي قال الظاهر المباراة بتصير اضافي

و يرفعها مالك القلاف

على راس كلاوديو

و قوووووووووووووووووووووووووووووووووووووووووووووووووول

و يهتز الملعب

طم طم طم طم ,, طم طم طم طم

و الي يصفق و الي يصارخ و الي يناقز ,, شي خيالي كاااااان

صج احساس يونس لما الواحد يكون بين الجمهور و فريقه اييب قول بالدقيقة الأخيرة من النهائي و يفوزون بالكاس

خصوصاً لما الجمهور يصارخ مرة وحده ,, هياااااااااااااااااااااااااااااااا

و نقزتهم مع بعض و التصفق و

الواحد صعب يوصف هالشي بصراحة ,, مو تضحكون بس صج لما اتذكر هالمباراة احس انه ودي تنعاد ;D

و باجر باخذ معاي ولد اختي ,, المقصيدي أكثر من عرباوي ;Pp

عشان بنروح نشوف ديربي شارع الحب ;Pp

دعواااااتكم للزعيييييييييييييييييييييييييييييييييييييييييييم ;D