برد
و السما مافيها ضو من الغيوم
يطل من الدريشة .. يشوف الشارع من دريشته الي المطر يتكتك عليها بيوم شتوي بارد مثل هاليوم
" جو لندني .. كئيب اي نعم لكنه ساحر و حرام أضيعه بالبيت "
يروح يحلق لحيته و يبدل ملابسه و يطلع عشان يدق سيارته سلف ,, " وين أروح بهاليوم .. مابي أضيعه مثل هاليوم ما ايي مرتين بالسنة .. اي خل اروح المارينا "
و اهو يتمشى بالمارينا جان يقرر انه يقعد بواحد من هالكافيهات ,, قعد يقرى الجريدة ,, و اهو يقرى الجريدة شاف اعلان حق منظمة خلاه يسرح ... جان يتذكر انه قعد بنفس هالمكان قبل سنتين ,, بنفس المكان الي شافها فيه أول مرة ,, كانت قاعده هناك قباله و كانت تقرى قصة ,, نظرته لها وقتها نظرة غير عن باجي النظرات ,, شافته يخزها جان تحقره أول مرة مثل ما تسوي مع كل واحد يخزها بس الفرق انه هذا خزها بذاك اليوم و الي وراه و الي وراه ليما تجرأ بيوم من الأيام و قالها
" لو سمحتي ممكن كلمة ؟ "
قالتله اي ممكن بس اختصر شايفتك و انت تخز صارلك جم يوم
قالها " مابي ألف و ألعب وياج ,, في مجال ولا لأ ,, و صدقيني انا مو قاعد اقص عليج او شي لأ انا يايلج اقولج هالكلمة و بعرف ردج "
نظرة التحدي الي كانت بعينها راحت ,, انبهرت ,, هذا من صجه
ردت عليه قالتله " هاا .. بس انا ما اعرفك ولا شي بس اخزك بالكافيه حالك حال باجي الشباب "
" ما الومج لما تسوين جذي .. بس شقلتي "
" أقدر أفكر لي باجر ؟ انت راح تكون موجود هني صح ؟ "
" إي بنفس المكان و بنفس الوقت نفس كل يوم "
" أوكي .. ممكن استاذن الحين "
" اي اخذي راحتج :) "
لما مشت جدامه لفت ويهها و ابتسمت له ابتسامة كلها حياء و براءة و اهو ردلها الابتسامة بابتسامة هم
و اهو بالطريج قعد يفكر .. ترضى .. ما ترضى .. يا ربي شهالبلشة
و ليلتها ما نام من كثر ما فكر بهالموضوع
ليما صار اليوم الثاني و راح هناك على الموعد ,, نطرها ,, الحين تيي ,, بعد شوي تيي ,, تأخرت ,, ليما فقد الأمل انها تبين بهاليوم جان يقول خل أمشي شكلها مهي ياية ,, توه ياي بيقوم ولا يشوفها ياية ,, شوي جان تقرب منه ,, ليما وقفت قباله ,, هني قالها : شقلتي ؟ جان تقوله ... في مجال .. قالتها و خدودها احمرت و نزلت راسها بالأرض
جان يقولها ... زين ما تعرفنا عليج .. شسمج ؟ :)
قالتله اسمي غدير و انت شسمك قالها اسمي شاهين ,, جان يعطيها رقمه و يقولها خل نمشي الحين علشان لا يشوفج أحد مع واحد غريب
قال هالكلمة و ما كان وده يقولها كان وده يقعد وياها لي نهاية اليوم و لي باجر و الي عقبه و ليلتها هم ما عرف ينام ليما رن تلفونه ,, اول ما شال التلفون جان يسمع صوتها على الطرف الثاني ,, ألو .. شاهين ؟
هلا والله .. غدير شلونج ؟
تضحك و تقوله : شفيك انا الي لازم اقولك شلونك .. انا زينة بس دقيت لاني حسيت انك ما راح تنام الليلة من المحاتاة
دقيت علشان اقولك انه ودي اتعرف عليك أكثر
جان يقولها .. مو غلط هم انا ودي اتعرف عليج أكثر و انشالله نتم مع بعض على طول :)
جان ترد عليه و تقوله ,, انشالله .. زين الحين انا بروح انام تامر على شي ؟
جان يقولها سلامة عمرج و سكر التلفون و اهو ما وده يسكره
و تمر الأيام و يتعرفون على بعض و كل واحد فيهم يذوب بحب الثاني جان على يوم يدق عليها و قالها
" غدورة شرايج اليوم نروح نتعشى بره في موضوع بكلمج فيه "
" ما عندي مانع بس خل يكون مطعم مو من المطاعم الشبابية دورلنا مطعم شيابي .. و تضحك و اهي تقولها "
قالها و اهو يكركر " اوووكي حاضر و الغنيمة مطعم شيابي مطعم شيابي "
و اهم بالمطعم بعد ما خلصوا العشا جان يقولها
" شوفي غدير انا قلتلج اني بكلمج بموضوع مهم "
" اي و شنو هالموضوع شاهين شغلت بالي طول اليوم "
" غدير بصراحة ابي اتزوجج و ابيج تكونين شريكتي بهالدنيا "
سكتت شوي و جان تشوف البحر و منظره بالليل من الأبراج يخلي الواحد يسرح و اهو يفكر
هني شاهين حس انها مترددة او ما تبي جان يقولها " الظاهر الموضوع ما عجبج غدير ,, اذا ما تبين ترتبطين فيني قوليلي ,, اذا في واحد ثاني قولي "
هني اهي دمعت عيونها جان يقولها شفيج عسى ما شر
قالتله " شاهين .. شاهين أنا من أول ما عرفتك عدل و انا ابيك تكون ابو عيالي و سندي بهالدنيا ,, بس كنت أقول هذا شكله يلعب علي و بعدين بيهدني ,, و الحين تيي تقولي هالشي ,, شاهين انا من فرحتي مادري اضحك ولا ابجي و مادري شقول "
هني شاهين ابتسم و قالها صدقيني ما راح القى أحسن منج يا غدور ... يعني اعتبر انج موافقة ؟
اي موافقة :) هذا كان ردها
و اليوم الي وراه ام شاهين خطبتله غدير و تم كل شي و الحمدلله تزوجوا و عاشو مع بعض عيشة هنية
ليما بيوم من الأيام و اهو بالدوام يرن تلفونه .. يشوف منو داق .. ولا عمته ام غدير داقة
" ألو هلا عمتي شلونج "
" شااااهييين وينك غدير بالمستشفى "
" هااااا ... وين باي مستشفى ... كاني كاني الحين ياي "
و يروح المسكين و اهو طول الطريج يدعي انه ما يكون فيها شي جايد
و لما وصل المستشفى و شاف عمته و عمه و امه و نسيبه بالمستشفى
" خير يا جماعة شصاير احد فيكم يقولي .. عمي .. عمتي .. حسين .. يما .. قولولي شصاير "
شوي جان يطلع الدكتور من الغرفة و راحله شاهين و قاله دكتور عسى مافيها شي ؟
جان الدكتور يقوله تعال معاي الغرفة بكلمك بموضوع
و اهم بالغرفة جان الدكتور يقوله انه غدير فيها السرطان و واصل مراحله الأخيرة و مافي أمل بشفائها
" هاااا .. دكتور شتقول .. غدير فيها سرطان .. من شنو .. ليش .. زين نوديها بره شي دكتور داخل على الله و عليك لا تقولي مافي أمل "
" مافي أمل صدقني .. أنا آسف "
هني شاهين حس انه الدنيا كلها طاحت عليه .. غدير الي حبيتها .. غدير زوجتي و حبيبتي .. غدير يصير فيها السرطان .. ليش يا ربي ليش ليييييش
و بعدين الدكتور قاله روح غرفتها و قولها يمكن تخفف عليها الخبر لما يكون منك و خلك قريب منها بالايام الباجية لها .. و الله يعينك على ما بلاك
لما دخل عليها الغرفة كانت بروحها قالتله " شاهين حبيبي شقالك الدكتور ؟ "
" غدير .. انتي شلونج الحين زينة ؟ "
" شاهين اي انا زينة مافيني شي .. الدكتور شقالك عفية .. امي و امك ما يقولون شي و ابوي بس يبجي .. قولي شصاير "
" غدير الدكتور قالي انه .. انه "
" انه شنو شاهين والله خوفتني "
" انه فيج الشين " .. قالها و خنقته العبرة لما قالها
" انا فيني الشين .. شاهين من صجك .. لا لا أكيد تتغشمر مثل عوايدك .. شاهين من صجك .. زين مالي علاج شي حتى لو بره " قالت هالكلمات و اهي تبجي
" غدير ... غدير ما ودي اقولج .. بس انتي واصلة لي مرحلة انه المرض ماله علاج :( "
" الله يعين .. دام انه ماله علاج عيل هذا ابتلاء و مالنا الا الصبر يا شاهين "
و تستمر على هالحال و اهي تاخذ هالادوية ليما نحل جسمها و راحت الطلة الوردية الي بويهها
و على يوم من الأيام لما كان شاهين يغديها جان تطل من الدريشة تقوله " شاهين "
" يا عيون شاهين المركبة .. آمري "
" شاهين اسمع صوت يهال بالشارع .. بشوفهم "
" حاضر و الغنيمة بس هذا الحين ادني فراشج من الدريشة "
لما شافتهم جان تبجي ,, قام شاهين و مسح دموعها
" شاهين .. انا آسفه "
" آسفة على شنو غدور ؟ "
" أدري انه كان ودك بياهل صغيرون تلاعبه بالبيت و تشوفه يكبر جدامك .. سامحني شاهين ما قدرت اييبلك هالياهل "
" غدير لا تقولين هالحجي .. انتي اهم شي عندي و انشالله تخفين و تقومين بالسلامه و العيال لاحقين عليهم ماني مستعيل على شوفتهم اهم شي تقومين بالسلامة "
" شاهين .. تحبني ؟ "
" أحبج .. شنو أحبج .. أنا أحب التراب الي تمشين عليه و تساليني أحبج .. حبيتج و أحبج و بظل أحبج لي آخر يوم بعمري يا بعد عمري "
" و انا احبك يا بعد عمري .. زين خلك يمي ابي انام و انا متطمنة اني مو بروحي "
" أفا عليج انتي نامي و تطمني .. تبين اصكر البردة ولا تبين تجابلين النور ؟ "
" لا لا خلها مبطلة مشتاقة للشمس ..... شاهين .. أحبك "
قالت هالكلمة جان تغمض عيونها و اهو رد عليها بنفس الكلمة .. اليوم الي وراه كان شاهين آخر واحد يمشي عن قبر غدير .. مشى عن القبر و اهو حاس انه روحه اندفنت فيه ويا روحها سوى
لما رفع راسه من الجريدة لفحته نسمة هوا باردة خلته يلف ويهه .. لما لف ويهه جان يشوف طيف .. طيف غدير .. غدير لما قالتله بنفس هالمكان انها تحبه
