في الدول المحترمة ,, و الغير محترمة ,, هناك أسباب تدع الشعب لا يقول إرحل عالطالعة و النازلة
في السويد مثلاً
آخر مظاهرات صارت في سبتمبر 2010
المظاهرات كانت تقول ارحل ,, لكن ما كانت تقول ارحل حق رئيس الوزراء ,, كانت تقول ارحل حق اليمين المتطرف الي حقق نجاح جزىي في الانتخابات بالسويد ,, شفتوا شكثر حلوين هالسويديين ,, ما يبون بلدهم يصير متطرف حتى
في النرويج صارت مظاهرات في فبراير 11 2011
المظاهرات كانوا مسوينها جماعات اسلامية حتى مو نرويجيين :)
في ايران يقولون ارحل ,, بس الحين صار الوضع ان كلمن يقول حق الثاني ارحل ,, و انا ناطر بشوف منو بيرحل قبل الثاني ,, أهم شي لا يجيسون شارع سجاد بمشهد ;**
في مصر قالوا ارحل ,, و بالفعل رحل ,, لكن شنو صار ,, الحين قاموا يطالبون برحيل المشير ,, و توابع المشير ,, و بقايا النظام ,, يعني الدرب طويييييييييل
في سوريا قالوا ارحل ,, كلوا مدار تبن مرتب
في نيكاراغوا أيضاَ صارت اشتباكات على السلطة بين اليسار و اليمين ,, و سقط ضحايا من الطرفين ,, و لكن محد قال ارحل يا ناصر المحمد ,, مالهم طبعاً مو مالنا
في الهندوراس أيضاً حدثت مصادمات بين الجيش و المعارضة لانه المعارضة كانت تبي رىيسها المنتخب و الجيش ما بده
في ساحل العاج كلنا شفنا ان الدولة ظلت بدون رىيس من شهر 9-2010 الى قبل فترة بسيطة ,, و ايضاً حدثت اشتباكات لكن محد قال ارحل يا الحسن واتارا مع انه مو صاحب اغلبية من الناحية الطاىفية و العرقية مثل باقبو
في اذربيجان طلعوا الناس بمظاهرات و اهم عايشين دور مصر ,, و انتهت المظاهرات ,, طبعاً لنفس الاسباب خرجوا الناس في مظاهرات
أما بالكويت
فاحنا ما نروح دواماتنا
و نمشي معاملات غير قانونية
و نصوت حق ابناء طاىفتنا و قبيلتنا فقط لهذين السببين
و نموت على الفساد و سنينه و نرعاه و نكبره
و ننشر الفرقة بين المجتمع ,, تحت مظلة الدستور و حرية الرأي #أوف كوورس
و تالي بكل بجاحة
نثير حمية الشباب المسطول الي خلص كل العاب السوني 3
و نقولهم يلا يا شباب ,, خنطيح رىيس الحكومة
أهي موضة
و احنا ترى مش عايزين العنب ,, احنا عايزين الناطور ,, العنب حناخده ,, حناخده
و الشباب على اوله دبجة و تشربك تشربك تشربك قاموا راحوا ساحة الارادة يا عَل ماكو ارادة
و حطوا هالكراسي
و نشروا هاللافتات
و ركبوا السماعات
و يقولك شنو
إرحــــــــــــــل
انتوا بالذمة ما تستحون على ويوهكم
ناصر المحمد يغلط ,, اي نعم يغلط ,, و يغلط وايد بعد مو شوية
بس مو انتوا الي تحدونه عالغلط ؟
مو انتوا الي تقولون لااازم العدد الفلاني من القباىل الفلانية يكون موجود بكل وزارة
مو انتوا الي تهددونه عالطالعة و النازلة باستجوابات اتفه من التفاهة نفسها
مو انتوا الي استجوبتوه على ناس استقبلهم
مو انتوا الي استجوبتوه على مسايد و دواوين ,, تشينكو !!
محد مودر الكويت غيركم
بكل أزمة تدخلون خشومكم و تكبرون الازمة لين تصير قد البالونة و بالاخير محد ياكلها غير هالديرة
اعنبوا استحوا ,, استحوا
شوية حيا بس مو أكثر
لا بارجت فيكم ولا في الساحة الي عرفتوا فيها كلمة
" دَستُور "
