الساعه 9:45
المكان : جامعة الكويت – كلية الآداب
التاريخ : 25-9-2005
الحدث : أول يوم جامعي !!
نزلت من سيارة ابوي الي صارت بعدين سيارتي و انا لابس بلوزتي الجيوردانو الحمرة ,, و جوتيي النايكي الي مثل لابجين مالديني الي شريته من هولندا << كان عزيز علي هالجوتي :p >> ,, و وقفت جدام باب الكلية
أووه سوري نسيت اعرفكم على نفسي
هذا انا ,, قبل خمس سنين :p
وقف ذاك الولد المتبتب بفنيتله الحمرة الي ما بقى صورة لعبة رياضية مو حاطينها عليها جدام الكلية
أول كلمة قلتها و انا داش الكلية " يااا معييييين "
المهم ,, دشيت الكلية مثل التايه لانه مادري شالطبخة
ولا يايني واحد من الإئتلافية كان زايرنا بالبيت قبل فترة و قعد يأهل و يسهل و هاتك يا بوس و حضن و حالته حالة ,, و جان اييني واحد ثاني و جان يقولي شووف هذي اول بوسة انتخابية لك و جان يبوسني ,, انا طقتني البوهة شفيهم هذولي @@
المهم وصلني واحد منهم لي كلاس تاريخ الكويت ,, عند منو ,, عند نسرة قسم التاريخ ;P ,, @@
انا داش مسطل ولا ادري شالسالفة وين الله قاطني
و هذي تهذر تهذر تهذر
و تخبص بالحجي
اهي تكلمت عن عبادة القبور !!
عن الثورة الاسلامية بايران :/
يعني اشياء مالها علاقة بالمادة
شوي جان تشوف واحد مكتوب يم اسمه انه اردني
جان تقوله " انت اردنيي ؟ " جان يقولها المسكين ايي انا أُردُني
جان تقوله اييييي ترى ما نسينا الي سويتوه بالغزو @@
هذي بدايتها جذي ,, و كان في ويانا بالكلاس سيد و طالب فيزيا متفوق ,, عطته D لأنه صار حجي بينه اهو وياها على موضوع عبادة القبور الي مادري شدخله بتاريخ الكويت !
المهم بعدين جان اروح كلاس الانجليزي ,, هالكلاس الي ما بقى من طلبته معاي الا ثلاثة الباجين كلهم تطشروا :p
كان عندي بهالكورس مادتين عربي خذيتهم كلهم بهالكورس عشان افتك منهم
من الاحداث المهمة الي صارت ببداية هالكورس اهي الانتخابات !
انا ما كان لي شغل و كانوا الائتلافية عبالهم اني بصوتلهم و المستقلة حاطيني بلستهم و الحالة حالة
طبعاً خلصت انتخابات الاتحاد بسرعة و انا كنت مصوت وسط بالاتحاد و الرابطة بدون لا اشم ريحة وسطي بالكلية
خل اقولكم قصتي شلون دخلت الوسط الديمقراطي :D
بعد انتخابات الاتحاد , واحد من الائتلافية تعرض لمحاولة اغتيال من المستقلة
حلو الكلام ؟!
طبعاً وراها هاتك يا نشرات و بيانات و الكنادرة نزلوا بيان استنكار خاص بالكنادرة مادري ليش كانوا عامليلي فيها قبيلة بالآداب :p
الحين انا مادري شالسالفة , جان اشوف واحد ,, حاط قفل ,, لابس نظارة ,, و شكله زقرتي لابس قميص و بنطلون ,, و قاعد يوزع بهالمناشير
جان اقوله ,, لو سمحت ,, ممكن تعطيني ورقة من الي بايدك ؟!
انا قلتله جذي جان اشوفه قاعد يمي و قاعد يسولف و انا لاهي عنه
و الائتلافية كذا و المستقلة كذا و فعلتهم و تركتهم و احنا " الوسط الديمقراطي " كيت و كيت
جان اقوله " أي عادي المستقلة حوش تقبل منهم أي شي "
جان ينصدم @@
جان يقولي ولد عمي انا اخليك الحين وراي شغل و انشالله اشوفك بالكلية ,, معاك اخوك علي (...) << صار منسق الآداب بعدين :p هذا كان اول علاقتي بالوسط اليوم الي وراه جان اييني يسلم و يبوس اهو بعد ! انا قلت ولييييه الجماعة شنو عمرهم مو شايفين خد ناعم ولا شنو :p المهم و قعد يسولف و حالته حالة و يناقش و يداحر عشان يكسب اعجابي , و يايبلي نشرات و حالته حالة , بس كان ونيس ايامها و اهو يحاول يضمن علي :p ما اشوف نفسي الا الحبيب حاطني بلستته :p بس الضحك مو هني يوم انتخابات الرابطة دقيت عليه , بعد ما خلصت الانتخابات , جان يقولي شاكرلك اتصالك و من هالحجي , شوي جان يدزلي مسج حب , وراه جان يدزلي نكتة @@ باعها الولد :p المهم وراها الحبيب يالي على يوم يقولي تعال وقع على ورقة , ييب خمس دنانير مبروك انت عضو بالوسط الديمقراطي @@ جذي جك بوم صرت عضو :p شوي جان ياخذني حق " العود " بو صفر بالآداب ,, هذا عميد الوسطيين << بيني و بينه سنة الا يوم :p و قعد يكلمني عن الوسط ,, المشكلة كل الحجي الي قاله كنت اعرفه و كنت بنحاش جان اقوله " انزين ليش الوسط طاح ثالث بالادارية ؟ معقل هذي " جان يقولي " انشالله رادينها انشالله " ,, و ما زال الحلم مستمراً بمناسبة الحديث عن درجاتي ,, كانت فلم ما عدى الانجليزي النحو خو الله بالخييييييييير خويا الشعر يعني كنت امشي حالي تاريخ الكويت فلم الافلام ما ندري الدكتورة شتبي ,, ولا اهي قادرة تفهمنا ,, و امتحاناتها صعبة ,, و اهي حشاكم و حشى السامع ,, بعد فهموها انتوا :p و طبعاً بينت على حقيقتها بالفاينل لما علقت الدرجات عالمكتب و سافرت مادري وين كان كورس صعب بس جميل ,, كبداية ,, ما كنت ادري شنو ابي بالجامعة ولا كنت عارف حتى شلون ادرس ولا شي ,, بس عدت على خير حصيلة درجاتي D+ D B C+ هذي الحلقة الاولى و خلصنا منها :p بالحلقة الياية اقولكم عن كلاس الانجليزي الي بغيت اسقط فيه و الصيفي الاول مع دكتورة ابتهال الخطيب و الفلم الي صارلي فيه :p See You ;D
