it's been a long time I know :)
-----
البنت قعدت تفكر بينها و بين نفسها
أضيفه ... لأ ما أضيفه شبي فيه ... خل أضيفه و أشوف شيبي و أرقعه أحلى بلوك ... لا لازم أضيفه و أشوف شسالفته شهالآدمي الي من مسج واحد يبي يضيفني !
المهم انها ضافته بالأخير علشان بتعرف شسالفته هالآدمي
ضافته و كلمته
و اهي تكلمه حست بشي غريب يطلع منها صوبه
ليما على يوم سألته قالتله
" انت حسين الي معانا بالقسم ؟؟ "
" إيييي أنا حسين الي وياكم بالقسم ... بس حيث انه حسين اسم مطشر بالجامعة و انا مادري انتي بأي قسم ولا بأي كلية فقلت يلا اي انا حسين الي وياج بالقسم "
" لوووول ... انا اسمي .. "
" شسممممممج "
" لووول .. انا سوسن الي وياكم بقسم الانجليزي "
" اييييي .. هم ما عرفتج بس الظاهر انتي عرفتيني .. بس من وين امج و ابوج طلعو هالاسم محد يسمي فيه الحين :p "
" لا تعيب على اسمي أحبه "
" أوووكييييي خلاص ماني معيب اسمج وااايد حلو "
مع الوقت اهو قام ينجذب لها و يحب سوالفها و ينطرها متى تشبك بالمسنجر عشان يسولف وياها و اذا مر يوم و ما شبكت ما يعدي عليه
هني قامت تييله افكار اهو ما توقع انها تييله ... اهو يحبها
ما تصور انه يطيح بشبك الحب مع هذي بالذات
فقام يفكر ... شلون اعبرلها عن حبي ... مابي اندقر ... مابي أحب و يصير فيني نفس الي صار ذيج المرة
بس هم لا بد من التجربة يمكن اهي تبادلني نفس الشعور و ما راح أعرف هالشي الا لمن اجرب
فقام يقط عليها نغزات ... و يقولها انا شكلي بدور غيرج مع انه مافي شي بينهم بس كان بيستفزها بهالاسالة و كان يقولها انا راح ادور وحده غيرج مابي أتم مع وحده مادري اذا تحبني ولا ما تحبني
ليما بيوم من الأيام قالتله انا بحضر كلاس من كلاساتك .. أهو استغرب من هالشي .. ليش تبي تحضر كلاس من كلاساتي .. هل يا ترى !!؟ ... فقالها لازم تستاذنين من الدكتور قالتله مالك شغل بالدكتور استاذن منه بس انت خلاص أخيراً راح تشوفني
المهم جان يروح اليوم الثاني و اول مرة يداوم و اهو متحمس حق هالمحاضرة و نطر عند الباب ... جان يشوف وحده غريبة اول مرة يشوفها واقفة عند الكلاس .. استغرب بس ما قال استغرابه حق أحد .. بس تاكد من انها اهيا لما شاف كل البنات دشو الكلاس و اهي ظلت بره تنطر الدكتور علشان تقوله بدش الكلاس ... لما دشت الكلاس فصخت النظارة الي كانت لابستها جان يشوف أحلى وحده شافها بالكلية من قبل اهي الي يحبها
استغرب .. معقولة هذي اهي .. لا لا .. شلون .. هذي اهي
جان يرد البيت و شبك ولا يلقاها شابكة ... ما يدري يقولها هذي انتي يخاف انها تكون وحده ثانية ... لا لا خلها اهي تقول اذا هذي اهي
قبل لا يكلمها جان تدش عليه مرة وحده تقوله
" حسين .... أنا الي انت شفتها تكلم الدكتور قبل لا تدش .... أدري انك قاعد تفكر تسالني ولا ما تسالني :p "
" تصدقين ... بعد كل الي صارلي و ادري انه حظي مثل ويههي ما تصورت انه بيوم من الايام تكونين انتي "
" زين حسين أبي أقولك شي و أبيك تفتح عويناتك عدل عدل "
" قولي "
" حسين .. انا .... أنا أحبك "
" صج ولا .. ؟! "
" لا لا والله صج صج انا احبك احبك احبك بس كنت ناطره اللحظة الي اقولك فيها هالشي "
" زين ... من متى تحبيني ؟ "
" من زمان من زمان حييييل بس كنت خايفة انك ما تكون تحبني "
و كبرت العلاقة بينهم و كبر الحب أكثر و أكثر مع الأيام و خلاص بدو يفكرون ببيت الزوجية لما يتخرجون و مع الأيام كانت تكبر معاهم أحلامهم الوردية
ليما بيوم و حسين يمشي بالكلية العصر جان يشوف سوسن تاشرله من بعيد
راحلها بيشوف شالسالفة اول مرة تاشرله بالكلية
" خير سوسن عسى ما شر خرعتيني "
جان يشوفها ولا قاعده تبجي
" سوسن شفيج ؟ "
" اختي طاحت علي و انا اكلمك بالمسنجر و طلعت مسيفة كل الكلام الي دار بيننا و اهلي خذو مني اللابتوب و قالتلي لو دريت انج كلمتيه مرة ثانية لا تلومين الا نفسج :"( "
المهم انهم اتفقوا انه التواصل بينهم يكون بالتلفون و استمر هالشي لمدة تقارب الشهرين شي جذي
بس كان التواصل بينهم فوق الخيالي
ليما على يوم و اهو يكلمها جان مرة وحده تقوله حسين باي باي اختي شافتني !!!
هني خاف عليها ,, اهو تسبب لها بمشكلة ,, و اول مرة قطعو عنها الانترنت الحين شبيسوون فيها
و ياخذه الهاجوس يمين و يسار و يلعب فيه و ما خلاه ينام ليلته
و راح اليوم الثاني الكلية و اهو بالطريج جان يشوفها صافطة بروحها ... جان يروح يصفط سيارته يمها و يكلمها
" سوسن شفيج عسى ما شر ,,, دزيتلج مسج و ما رديتي "
" بعععععد ,, حسين خلاص انا وياك انتهينا "
" شنو يعني انتهينا ؟ "
" اهلي طاحو علي امس و انا اكلمك و خذو مني التلفون و الحين اكيد شافو مسجك "
" زين انتي مو قلتيلي انج مسحتي كل مسجاتي من قبل "
" ايييي بس كان في المسج الي دزيته لك بعيد ميلادك ما مسحته خليته حق الذكرى و اختي شافته "
شوي ولا اييلهم الشرطي و سوالهم سالفة بالشارع ليش انهم واقفين و يسولفون جان لما يمشي الشرطي يقولها روحي الكلية نتفاهم هناك
و بالكلية قالتله انها بتسافر و خلاص لازم ينساها لانه اهلها ما يبونهم يكملون مع بعض
الحين حسين قام يفكر شيسوي علشان اهلها يحسون فيه .. قال ماكو إلا اني أروحلها المطار لما ترد ... و جان يسال رفيجتها متى بترد و اهي قالتله ما ينفعك هالشي خلاص البنت بتتزوج خلها بحالها لا تلاحقها و تاذيها
و بالف علة و علاج جان يطلع منها موعد الرحلة و لما راحلها المطار لقاها كاشخة و باحلى زينتها و لما طلعت جان تسلم على واحد اول مرة يشوفه .. ما شافه من قبل لما سافرت لان كان رايحلها المطار
و اهي كانت تمشي مع هالريال جان تشوفه و تنصدم ... و انخطف لونها
هذا شيبي ياي هني ؟ خلاص خل يهدني انا ما ابيه انا على ذمة ريال الحين
و اهو حسين لما شاف هالموقف عزت عليه نفسه و راح البيت و نام و اهو متضايق ليلتها
و لما قعد الصبح جان يشوف ولا رقم قاعد يدق عليه ... رقمها
" ألو .. "
" حسين شلونك ؟ "
" بخير "
" حسين امس ليش ييت المطار ,, حسين بس خلاص انا على ذمة ريال ثاني "
" بهالسرعة ... نسيتي ... نسيتي لما كنتي تقولين ماكو قوة بالدنيا راح تبعدنا عن بعض ... نسيتي لما قلتي راح اوقف بويه أهلي علشانك "
" اوووه حسين اهلي خيروني بينك و بينهم و قالولي اذا تبين رضانا خلاص اخذي هالصبي الي احنا نبيه و وخري عن الي تكلمينه ولا بتشوفين شي ما يسرج لا دنيا ولا آخرة "
" هههه .. انتي تضحكيني .. أصلاً انتي الظاهر انج كنتي تبين تتزوجين و مالج خلق تنطرين ليما اتخرج و شفتي هالصبي جدامج قلتي خل اتزوجه و شلي بحسينو شكله مطول بالجامعة "
" حسين لا تقول جذي "
" أقول .. انا واحد بصراحة ما توقعت انج جذي بتنسيني بهالسرعة .. روحي .. الله حسيبج و أنا كنت متوقع هاليوم و قلتلج هالشي من قبل بس انتي كله كنتي تقولين حسوني لا تقول جذي ما احبك و شوفي الحين سويتي نفس الشي الي قلتلج عنه "
" حسين .. "
" لا تييبين اسمي على لسانج ... بس خلاص ... باي ... باااي "
و من يومها و اهي مالها لا حس ولا خبر
و حسين للحينه ... رغم انه عصب عليها و زعل منها بس ما كرهها
لأنها كانت الانسانة الي حبها
حبها من كل قلبه
و لانها كانت الانسانة الي حبته من كل قلبها بس ما وفت لكن رغم ذلك حبته
بس
انتهى هالحب بطريقة مأساوية ما كانت متوقعة بين الأثنين
النهاية
" أعتذر منكم على طول الإنتظار و آسف انه النص الثاني من القصة حسيت انه يفتقد الحبكة :( "
