Headcases

Headcases

هالمسلسل شفته قبل فترة على قناة شوتايم كوميدي

المسلسل بالضبط يسفط مسلسل سكوب المليق الي اسمه صوتك وصل عاليمين و يقعد

و انتقاداته مو عالشكل ولا الصوت ولا هالسوالف ,, لا لا انتقاداتهم لاذعة

و الوحيدة الي سلمت منهم الملكة

بس!

غوردن براون بكل حلقة نايمين ببطنه

ويليام و هينري متهزئين

جيرارد و لامبارد ملعون خيرهم ;Pp

حتى كابيلو الي مو انجليزي طابين فيه ;Pp

بس ما اشوف في احد قال انه والله وقفوا هالبرنامج لأنه يسيء لذات البعض المصونة

يعني المسألة مش مستاهلة

و هالشي كذلك ينطبق على مسلسل سكوب المليق

ماله داعي نتنشن

المسلسل الي يستحق الايقاف اهو مسلسل بوقتادة الزفت

لأنه ماني شايف انه اكو شي غلط انقال بمسلسل سكوب

يعني كلنا نعرف سالفة بوعبدالعزيز الله يحفظه مع البشت

و كلنا اندقينا ابرة الدكتور الخطيب بالعضل و احنا يهال

و مسلم صراخه على قدر الألم

و الصانع دبيك درجة أولى

و سَفَر خو بعد يتشاقون وياه ;D

صفوا النية يا جماعة صفوا النية ,, في رمضان تصفد الشياطين علامكم صايرين شياطين اكثر منهم ;D

The guy looks like a rat ;Pp

cheers Kuwaities ;D

حرب الفيمتو !

رمضان قرب

و التجهيزات على ودنها

و كلمن يشتري

و كلمن يخزن

و ما يخزنون قبل رمضان بيومين ثلاث حق حاجتهم

لااااااااااااااااااااااااا

والله الاسبوع الي طاف بمركز سلطان الفحيحيل كرهت عيشتي ,, الله وكيلكم داش الجبرة مو مركز سلطان @@

الرفوف تصفر

الخبز خاااالص بكل انواعه و اسعاره و اشكاله

بححححح

المعلبات بالغصب تلقى الامريكي الي محد يشتريه ليش انه غالي !!

ليش يا جماعة ليش

بس هذا كله يهون جدام



حــــــــرب الــــفــــيـــمــــتـــــو !!



بدت علاقتي بهالحرب لما قريت اعلان جمعية الدسمة

بطل الفيمتو ب 395 فلس

قلت حق امي جان تقولي روح باجر ييبلي كرتون

لحد الآن الأمور سليمة ,, ماشين بالسليم



اليوم الي وراه طلعت من الكلية و رحت جمعية الدسمة

جان ازخلي كرتون من كراتين الفيمتو

رحت عند الكاشير



جان يطالعني بنظرة جنه وده يكوفنني !

و قالي



" كده ,, ما ينفعش ,, اتنين تلاته بالكتيير "

و انا العبد الفقير إلى الله جان اخذلي ثلاثه بعد ما يصير ارجع بخفي حنين

طلعت و رديت البيت



بالليل امي تسولف ويا عمتي و جان تقولها عن سالفتي

شوي جان امي تضحك

قلتلها شفيج ضحكينا وياج ;D

جان تقولي عمتك تقول انه البطل بجمعية الدعية بربع دينار و الناس مو محصلة !!



و طلع صج انه جمعية الدعية خالص منها الفيمتو

و الناس هناك طق مطاقق صاير عالفيمتو لدرجة انه امس يقولون الشرطة متدخلين يفاككون الناس عن الفيمتو بالدعية !!

و اليوم بجمعية صباح السالم هم ربع
و بالصباحية 245 فلس

يعني المسألة راح تصير مسألة بقاء ,, حرب أهلية بسبة هالفيمتو

يا جماعة عيب
والله عيب ,, اعنبوكم استحوا على ويوهكم
عشان بطول فيمتو جذي يصير فيكم و تضحكون الأمة عليكم و تتهاوشون و حالتكم حالة
شراح يصير فيكم
بتموتون ان ما شربتوا فيمتو ؟
والله جان بتموتون ان ما شربتوه عساكم تموتون و نفتك منكم و تزيد معاشاتنا ;Pp
ما يحلى صيامكم الا مع الفيمتو ؟؟
والله اذكر قبل سنتين انتخابات الجامعة كانت برمضان ,, كان فطوري آيس تيي ,, الله وكيلكم كان شنو يسرسرح ,, يشرح القلب الحزين ,, بلا فيمتو بلا وجع قلب !!
و بعدين شفيها العصاير الثانية
غيروا يا جماعة
شربوا ليمون ,, شربوا برطآآن ,, شربوا رمان ,, توت ,, كرز ,, سمسم ;D
بس ولا انه يصير فيكم جذي ,, عيييييب يعني ما يجوووز يا حبايب
رجاءً ,, أتمنى هالشي ما يتكرر مرة ثانية
و الي فيكم يعرف مكان يبيعون فيه الفيمتو بكراتين للحين يقولي لأنه امي شاقتني كل مرة رادلها ببطل ولا بطلين ,,, بطول فيمتو مو شي ثاني ;Pp
حتى لو استلزم الأمر أعسكر بميناء الشويخ بانتظار الشحنة اليديدة القادمة من بلاد الإنجلتار ;D

seeee you ;D

إهداء حق الحبايب الي زعلانين علي ;D

الحقيقة!

في الحقيقة انا فتحت صفحة كتابة البوستات و لا يوجد هناك ما يشغل ذهني

لكن فوجئت بانه يت على بالي فكرة الحقيقة

شنو اهي الحقيقة ؟

الناس يفنون عمرهم و اهم يمشون وراها ,, يدورونها

من مكان لي مكان

يمشون وراها بكل فريج و سكة و بكل شارع

يموتون قبل لا يلقونها

يعني انا اعلم في حقيقتي و قرارة نفسي اني قاعد اسوي اشياء غلط

قاعد ألقي وايد ناس ويه

قاعد اعطي ناس اولوية بحياتي و اهم يمكن ما يعطوني دور ثانوي في حياتهم

قاعد اتغاضى عن حقي

قاعد اجامل ناس ظلموني

و كل هذا أسويه

و أدري انه غلط

و انه هذي اهي الحقيقة اني قاعد اسوي الشي الغلط

لكني مع ذلك

كل يوم قبل لا انام

أقول ما راح أكرر هالأخطاء و لازم احط حد حق هالاشياء

لكن أقوم الصبح و و أكرر نفس الأخطاء

يعني القائمة مثلاً

ظلمت فيها ,, بشكل او بآخر ظلمت و لكني ما عملت ضجة ولا شي

آثرت الإنسحاب

و صدمت بعد فترة انه اقرب الناس لي

قاموا يقولولي انت كنت غلطان و انت ما تؤمن بالديمقراطية و انت غلط و كنت مكبر راسك على فلان عالفاضي

و سكت هم ,, لأنه ادري بعد فترة كلامي بيطلع صح

و الفعل كلامي طلع صح

و حالياً الأشخاص الي وصفوني بكل هالاشياء قاعدين الحين يعانون بسبة تكرارهم لنفس الأخطاء و رفعهم من شأن ناس ما يستحقون حتى نظرة ثانية

و لكن مع ذلك ماني متشمت فيهم ,, مع انه محد راح يلومني لو شمت فيهم ,, بس مو من طبعي

الحقيقة انه احنا قاعدين نعطي وايد بحياتنا ,, نعطي المستحق و الغير مستحق

بدون مقابل ,, و كذلك بدون حدود

و النتيجة قد تكون نكران الي نقوم فيه او شيء ثاني لكن صعب انه يكون الشكر اهو النتيجة حق الي نسويه

و لكن نظل نكرر نفس الأخطاء

إذا أقدر أقول إن الحقيقة عارية ,, كلنا نشوفها ,, و لكنها سوداء ,, فلذلك نوخر عنها و ما نحبها :)



Don Juan.