صااااااااااااارت ;D

ينحل ولا ما ينحل ؟؟

شو رأيكُن يا إخوان و يا أخوات ,, بتزنوا انوا الحل رح يجي عن أرييب ؟؟

والله ما يخلون الواحد ينام حق بداية الكورس اليديد

ولا حتى يتهنى بالاغنية الي قاعد يسمعها

يبليييكووون بحمىىى إلهي

:@

رسالة إلى الوالي

أبراج الكويت - رمز الشموخ

بهذه المناسبة العظيمة و العزيزة على قلوبنا

ألا و هي

مناسبة عيد جلوس رائد نهضتنا و أبو ديمقراطيتنا و دستورنا

المغفور له بإذن الله الشيخ عبدالله السالم الصباح

فإنني أغتنم هذه الفرصة

و أظن لو أن الشخص الصقلي لا يرفض طلباً لأحد في يوم زفاف ابنته

فإن معالي حضرتكم لن يرفض حتى قراءة شكواي هذي في مناسبة عظيمة كهذه

المناسبة التي تعد بمثابة يوم الزفاف لهذه العروس التي نعيش ضمن حدودها

المسماة بالكويت :)

طال عمرك ,, الوضع السياسي بالبلد ,, عال العال

وزراء يلعبون بالحلال

وزراء يلعبون بخلق الله تيّل

مجلس وزراء بكبره مو لاقي حل حق مشكلة تتكرر للمرة الثانية عندنا بالكويت الا و اهي

أزمة سوق الاوراق المالية

مجلس وزراء يعجز انه يفرض هيبة القانون على المتمردين

مجلس وزراء صاير مجلس محاصصة

مجلس وزراء اشوفه يتكلم عن زيادات بخبر و تحت الخبر بنفس الجريدة خبر ينفي هالخبر !

طال عمرك ,, كل هذا يصير و الحكومة زي البنت الدلوعة تحط حق كل شي خط أحمر طال عمرك

خلنا منهم هذولي مو خووش

نروح حق مجلس الامة

طال عمرك ,, هالمجلس باختيار الشعب

بس الشعب أثول

اي والله طال عمرك احنا ثولااان

خبوووووول

مدمغييييييين

طال عمرك احنا بدال لا نختارلنا نواب يهتمون بمستقبلنا

نواب يهتمون بخطط تنموية

نواب يهتمون بخطط تهدف للقضاء على البطالة المقنعة الي عندنا

نقوم نختار نواب ينقزون لنا فوق القانون قفزات بهلوانية اسمها واسطات

و طال عمرك لوما الوزراء الزقمبية جان ما شفنا شي اسمه واسطات

نهتم انه نختار نائب يمثل يا توجهنا المذهبي ,, يا يمثل قبيلتنا ,, يا يمثل عايلتنا ,, يا نائب يدهن سيرنا بجم(ن) ألف لا و مرات اقل بعد و نصوتله أهم شي نقبض البيزات

و بالأخير هالنواب ما غير يلعبون ديج و دياية بالمجلس و تلقاهم يتناحرون على تأبين ولا على فتوى اطلقها واحد بالسعودية

و تلقاهم هم يمكن يمدون ايدهم عالمال العام ,, خو مو كلهم شرفا

البعضضضضضض و ليس الكل ,, بلاعين بيزة طال عمرك

و يموتووووون عالبيزة الي تييي من بعض الاطراف طال عمرك

طبعاً ما انسى طال عمرك اني اذكر انه الحكومة و الميّلس لا يعدون كونهم مجموعة تيّااار طال عمرك

ولا نائب سلفي مديونيته 470 مليون دينار كويتي طال عمرك هذي وين صارت ؟؟

لو بالدينار العراقي ولا التومان الايراني جان قلنا بس بالدينار الكويتي

ما علينا طال عمرك ادري طاريهم يسم البدن

طال عمرك صرنا بزمن كلمن يحجي فيه عالمجلس

ما يصير جذي

طال عمرك هالناس نست انه من دون المجلس مالهم لسان

طال عمرك كلمن قام يدعو لحله

حتى المطاوعة و الملالي يدعون لحله بكرة و عشية

طال عمرك الوضع بالبلد يخوف دام هذولي اهل البلد

ما يصير جذي طال عمرك الناس كفرت بمجلسها و ديمقراطيتها

أول مرة نشوف دولة بالعالم الحريات توصل لي عند بابها و ترفسها و تطالب باغلاق مصنع الحريات فيها

معلش طال عمرك استحملني شوي ادري اني ثقلت عليك

طال عمرك قمنا نشوف التكفيريين يعلى صوتهم بالبلد

احنا من عمرنا نختلف

سواء على اشياء بيننا ولا اشياء خارجية

من الستينات نختلف ناصري ولا شيوعي

و بعدين اختلفنا الخميني ولا صدام

وراها اختلفنا ليبرالي ولا اخونجي

بعدين اختلفنا امريكاني ولا حمساوي

طبعاً هذا كله ما ينسينا خلافاتنا الازلية الا و هي

عرباوي ولا قدساوي

شيعي ولا سني ؟؟

لكن بالنهاية كنا ايد وحده و قلب واحد

لكن طال عمرك لما اسمع واحد يخطب بالكويت يقول حق مجموعة شباب بما معناه

انه الي يغلط على حماس يستاهل التكفير

فاعتقد انه الوضع يحتاج مبادرة طال عمرك

أذيتك طال عمرك ؟؟

والله ادري بس ماكو إلا هاليوم و انا ادري انك مشغول بس سامحني

طال عمرك نروح للشعب

هالشعب جدام الناس تلقاه يتفاخر انه انا كويتي انا

انا عزومي قوية

طال عمرك الشعب صاير للأسف شوية طرارين ما غير يطالبون باسقاط القروض

تقولهم ازمة سياسية يقولك اسقاط قروض

تقوله المساعدات الخارجية يقولك اسقاط القروض

تقوله ازمة عالمية يقولك اسقاط القروض

طال عمرك مو منهم ,, من نوابهم

نروح للجانب الاجتماعي

طال عمرك طول عمرنا خابرين الكويت و شعبها مثل الطوفة

طابوقة تدعم طابوقة

و الطوابيق كلهم مع بعض يشكلون الطوفة المتينة للكويت

طال عمرك احنا اختربنا

ردينا على عادتنا القديمة

ردينا على المعاياة بيننا و بين بعض

هذا غير انه احنا اساساً ما نتعلم من دروس قبل

بس ما عليه

شوية يهال احنا طال عمرك " في بعض الأحيان مو على طول "

طال عمرك وصل الفساد حتى لاخلاقنا

تخيل طال عمرك صرنا نحتاج حق ناس مثل نبيل العوضي و يوسف الثويني و غيرهم عشان يعلمونا مكارم الأخلاق

و المشكلة طال عمرك انه احنا بالأساس محنا شعب دين

جذاااااب الي يقول الكويتيين دينين و مطاوعة كلهم

أصلاً ماكو شعب بالعالم مطاوعة

حتى الدول الدينية شعبها مو مطاوعة ولا حتى ملالي

بس احنا طال عمرك نحب نماري نفسنا

نقص على نفسنا بسوالف البنوك الربوية

و الانشطة و البرامج و الندوات الدينية

عشان احنا فينا عقدة نقص طال عمرك انه احنا عمرنا ما صارحنا نفسنا بواقعنا

لأن بنفس المجمع الي تقام فيه ندوات دينية تلقى شباب يتحرشون بالبنات يومياً

و بالأمس و انا رايح المارينا مول طال عمرك و بشكل اجباري مريت على مسيرة احتفالاً بهاليوم العظيم

تصدق طال عمرك لقيت سيارة جدامي عليها من ورى ستكر

هالستكر ديني

مافي اي مانع منه

لكن الغريب طال عمرك انه من نفس السيارة كان في بنت تتحرش بالشباب و ترشرش عليهم فووم !

هل هذا يعقل طال عمرك

هل وصلنا لي هالحد

للأسف اي نعم

و للأسف انه بسبة هالشي قمنا نسمع دعاوي من ناس يطالبون انه الكويت تصير مثل جارتها الجنوبية

طال عمرك يرضيك ؟

درتنا تصير مثل السعودية ؟

لكن شتقول طال عمرك

انا ادري اني طولت عليك و انت جريب تقولي عطني مقفاك

بس ابي اختم كلامي بشي واحد

احنا " أقدع " ناس

و الي يسوونه مجموعة فيننا ما يعكسنا كلنا

احنا وقت الشدايد صف واحد

و حتى بوقت الراحة احنا صف واحد

لكن في بيننا شوية سوس الله يكافينا و يكافيك طال عمرك شر السوس

طال عمرك تعبنا من هالسوس

قام ياكل فيننا هالسوس

و احنا شعب متربي و خلوق و ألسطة و سنقت عشرة و بيعجبك كتيير

لكن طال عمرك

احنا غلااابه أوي :)

مع السلامة طال عمرك و أتمنى اني ما أكون ثقلت عليك :)

أحد المواطنين .

الماسونية ! - تحديييييث -

رفيجي ذاك اليوم يقولي عن وايد ناس انهم ماسونيين

حتى الحلاقين الي بفريجنا طلعوا ماسونيين و انا ما ادري

بس سالته عن جم شخص و ما عرف يجاوبني

هذولي,, ماسوووونيييييين ؟؟

الي يعرف الجواب يقولي لأنه هذولي عاملين فيا عمايل ;D

That's why people loved them :)

بفترة من فترات القرن الماضي

كان في فترة الكل الحين وده يعيش فيها

الي اهي من الخمسينيات تقريباً إلى السبعينات

كانت فترة ازدهار الموضة

و الفن كان بقمته

و الحروب الأيديولجية على أشدها < هذي سلبية ترى مو ايجابية بس اتوقع انها كانت مسوية أكشن ;Pp

لكن العلامة الفارقة بذاك الوقت الي الناس للحين تتذكرها اهي شيين

تصاميم ايف سان لوران الخارجة عن المألوف

و الخنافس

عفواً

The Beatles :)

صج لما الواحد يسمع حق هالفرقة بالذات يعرف ليش البنات كانوا يذوبون لما يسمعون اغانيهم و ليش الشباب كانوا متخذينهم مثل النموذج الجميل للشباب بذاك الوقت

اغانيهم حلوة

و محترمة

و مفهومة

و توصل المعنى بسرعة

صج لما اسمع اغانيهم احس انه ودي اعيش بذاك الوقت

The Age of Beauty, Innocence, Purity, and Upon All ,, FREEDOM :)

كان كل شي تمام

و مثل ما قال عادل امام بعمارة يعقوبيان

الشوارع كانت نظيفة و الناس كانت محترمة

و انا أقول الفن كان محترم بذيج الفترة الي شهدت تقريباً أروع انتاج فني بكل العالم

قبل لا نسمع باغاني الهيب هوب و الهيفي ميتال و الاغاني الي تكاد تكون فلم اباحي بالكامل و قبل لا يطلعون لنا ناس مثل هانا مونتانا و كريستينا أغيليرا

بحطلكم اغنيتين من أفضل ما سمعت للبيتلز :)

Ask Me Why ?

P.S I Love You!

Valentine ??

الي عنده احد يقوله

Happy Valentine ;*

خل يقوله

الي ما عنده احد نفسي خل يسمع هالاغنية

إسمعنيييييييييييييييييييييييييييي

See You Soooooooooooon ,, the coming post is #100 ;D

The Bunkers of Bnaider !

جربتوا من قبل احساس انه في صبة كاملة قاعدة على صدوركم و قامتة نفسكم ؟

مو خوش شعور

و امس كنت حاس فيه بسبب ,, ولا اقول خلوني ساكت ,, خليها بالألب تجرح ولا تطلع لبره و تفضح :)

المهم

دق علي صديقي و عزيزي جابر

هااا علااو وينك ؟

بالبيت

شعندك يا شقول صايرلك مدة مو مبين

والله ماكو ضيقة خلق

ايييي يالله زين دلني بيتكم الحين بييك

المهم دليته البيت

و انا قاعد البس ملابسي جان يدق علي يقولي ييب كامرتك وياك !

اليوم عندنا مغامرة !!

المهم وصل بيتنا و سلم علي و قالي دلني ماكدونالدز أول شي

المهم رحنا ماك

طلب اهو و رحنا قعدنا عالطاولة

شوي ولا ايي واحد ورانا باسكتاني

اول ما قعد جان يسلم علينا !

شوي جان يعطينا وجبته

قلناله لا مشكور ما نبي طالبين

رد علينا بالاوردو !

طلع ما يعرف عربي

رفيجي كلمه بالايراني ,, ماكو فايدة الريال توه طالع من حيدر آباد ;D

و لجنا

كل دقيقة يعطينا اكله يقولنا مأكل هييه ؟؟

مرة يحط عندي الدياي ماله مرة الصمونة

جان اقوله آخر شي يا بعد جبدي اكل انا شبعاااااان و قاعد احرك ايدي بشكل دائري على بطني ;Pp

احنا ما سويناله شي عشان كنا خايفين انه يكون كاميرا خفية

المهم الحين إلا يبينا نقرى من النوته مالته

و رفيجي يقوله انا ما اعرف

و يروح يقوله انا اكتبلك جان ياخذ قلم من مدير ماك و يكتب بالأوردو !!

آخر ما توصلنا له قبل لا ننحاش انه اهو تايه و ما يدري وين بيروح و شكله توه ياي من باكستان

بس وايد كان يردد كلمة فوهيل فوهيل ,, احنا قلنا يمكن قصده الفحيحيل ,, تهقون شنو يقصد ؟؟

المهم مو هذا الموضوع الأساسي حق الليلة الي طافت

رفيجي قالي بوديك مغامرة

قلتله وين

جان يقولي بوديك بنيدر !

قلتله جابر شوف بتخطفني قول عشان لا تختلف اقوالنا بالمخفر ;Pp

جان يقولي لاااااا شخطف فيك شنو ناقص بلاوي انا ;Pp

المهم ولا اثاري الحبيب دال مكان فيه خنادق ملوت فرقة عسكرية قبل

الي يروحون بنيدر اتوقع دخلة 250

فيه هناك لواء دبابات جنه

خلوه وراكم و كملوا سيده يصير على يمينكم مكان مثل ثكنة عسكرية او شي جذي مهجور

عشان اعطيكم المعلومات بشكل أوضح

هالحجي كان الساعه 1 الفير ;D

المهم وصلنا هناك

و انا قلبي طاح ببطني

ماكو شي يمنا

و خررررمس

المهم قاعدين ندور الدخلة

مولاقينها

كل شي محفر بهالمكان

اخترعنا بصراحة ;D

المهم بالأخير جان نلقى الدخلة

طبعاً المكان وعر جداً و احنا داشين بشنو

بملك الطرقات

بقاهر الصحراء

بالملك

بأعظم سيارة سووها أهل اليابان

TOYOTA CAMRY ;Pp

المهم والله ما قصرت الكامري

اول شي صورت مكان مثل شسمونه

قولوا معاي

المتاريس ,, الي الجنود ينخشون وراهم على مود الفشق ما يحوشهم ;D

بعدين رفيجي يقولي ترى انت ما شفت شي للحين

لف وراك

لفيت وراي ولا المخازن و هالبلاوي وراي

اكثر شي يخرع كان هذا

انا بصراحة ما تجرأت اقرب منه اكثر من جذي ;D

المهم بعدين جان نروح بنصور مدخل الخندق الي ورى هالبنكر

و احنا قاعدين نصور قلت جابر صكر ليتات الكامري عشان لحد يجكنا

و عشان الاضاءة قلت خل استعمل فلاش اكستيرنال

المهم انا بس طقيت الفلاش جان مرة وحده الخط السريع يصير ظلمة

بالتزامن بنفس الوقت كان فلاش كان بلاك حق ليتات الخط السريع ;D

منو يقول ما اخترعنا :p

المهم خذينا صورة تذكارية هناك و لما يينا بنقوم ولا نشوف ليتات جيب !

الحق ما تلحق يا ولد

ولا تشوفون شكلي و انا اركض و شايل حامل الكاميرا معاي و ناسي انه احنا يايين بسيارة ;Pp

و بالأخير طلعوا نفسنا

Myth Busters ;Pp

بس شرايكم بالمكان

ما يخرع ؟ ;Pp

روح موت ,, محد راح يرضى فيك

المتن ,, السمنة ,, البدانة ,, الخ

مشكلة وايد نعاني منها بدولتنا خصوصاً لأنها مرتفعة

أنا واحد من الناس اعاني من هالمشكلة

و قد ما حاولت احلها ,, حتى لو التزم بالنظام الغذائي جسمي أخذ الشكل المربع بحيث انه

صار الوضع بالنسبة لي شبه مستحيل :(

بس ستل مو هذي المشكلة

المشكلة ماكو أحد حتى يظهرلي الدعم

كل مرة اول ما ابلش النظام الغذائي بالضبط امي تبدى مرحلة تعذيب معاي

كل مرة نفس الشي

أول يوم تسوي غدا مربين ثاني يوم مجبوس لحم

و كل شي حلو تسويه بشكل مو طبيعي

و يعيبون

بس هم راضي بيتنا و يمونون

و هم مشركين اختي بدايت سنتر بس ما قلت شي فلوسهم و كيفهم كل هذا عشان انا اشتغل مصور لازم انا الي اشترك :/

نروح من بيتنا لي بيت يدي

شي مو طبيعي الوضع هناك

كل ما اروح لازم اسمعلي حجوه

خو مستحيل البس شي اسمه بنطلون اذا بروح هناك مرة بالغلط رحت و انا لابس بنطلون حصلت طنازة حق اسبوع

بس شنو المشكلة

انا متين

و انا ادري بهالشي

بس مسألة انهم ما يشوفون غيري متين فهذي فيها مشكلة

و ادري اني لما اغتر اصير جني غازي الياور

بس هم مو هني المشكلة

المشكلة انه عندهم اثنين بهالبيت امتن مني بمرااااااحل

بس شنو الفرق

اهم ما يشوفونهم متان

بالضبط نظام : إن حبتك عيني ما ضامك الدهر

هالاثنين واحد اسمه م و الثاني اسمه ي

محمد هذا امه كل ما اروح بيت يدي تصرعني

اخييييه م صاير ضعيييييييف يرووووح الناااااادي و ياخذ حبة تنشف جسمه زيييييينة واااايد جسمه ماكو ماكو صاير ضعييييييييييف

و م هذا الله وكيلكم ما يقدر يوقف مستقيم من كثر ما اهو متين ,, تخيلوا متن و عضلات الكومبليشن الزفت الي يخلي الواحد جنه فرس النهر ,, بس ما يشوفونه متين

نروح حق ي

ي هذا دش الجيش دورة عرفا و ضعف ,, من تحت بس

اما كرشه فالله وكيلكم تقولون كرشة مارادونا لو شنو ما يسوي تظل موجودة

هذا ذاك اليوم شفته

الله وكيكلكم و محمد كفيلكم و في منكم هني الي يقرون شايفيني

انا ايدي اشوفها كبيرة

والله لما سلمت على ي قعدت اعد اصابعي لا يكون في واحد ناسيه بايده !

كرررررش ,, ديوووود ماني قايل صدر لأ

Man Boobies

و تزوج هذا

و ما كان في اي مشكلة !

و طبعاً اثنينهم لو بتكلم عن المستوى الأخلاقي الله لا يبلينا

يمكن ما اجذب ان قلت ربعي يدعموني و يحسوني فيني اكثر من بيتنا

والله ما اجذب ان قلت هالشي

يعني شالحل بالله

ما أروح ؟

ما أقدر ,, يشرهون وينه هذا ما يبين

و ان رحت سمولي بدني و رديت بيتنا

المشكلة ما عمرهم اهتموا انه

والله علي الوحيد بين جيل كامل عنده انتماء سياسي اختاره بروحه

والله علي الوحيد الي يفكر و يناقش

والله علي الوحيد الي يقعد مع الرياييل و ما يلعب سوني

والله علي الوحيد الي ما يقضي وقت فراغه بالمجمعات يتحرش ببنات خلق الله

والله علي الوحيد الي يعرف يتكلم بين الناس

لا لا لا هذا كله مو مهم

علي متين

علي لازم يصير ضعيف بعدين نفكر بكل هذا

طبعاً انا ما تكلمت عن اختي الي ما عندها تقولي الا اييي اضعف خو انت جذي منو بيسأل فيك

ليش الناس صايرين جذي :(

it just sucks :(

De Niro and Pacino buying Ice Cream ;D

I have to say, this is one the funniest clips I've ever seen on YouTube.com ;D

enjoy it ;)

آخر هرطقات عمادة الدواجن !

أول شي بحطلكم بيان رابطة طلبة الطب على الترهات الي قاعده تمارسها الجهة الي اسمها جوازاً عمادة شؤون الطلبة و بالأحرى هي عمادة شؤون الإئتلافية :)

*****

بيان رابطة طلبة الطب الكويتية
بشأن ما أثير أخيرا حول مخالفة رابطة طلبة الطب الكويتية للوائح و القوانين

وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيه الأَبْصَارُ )) سورة إبراهيم الآية 42


لقد ساءنا كثيرا ما تداولته بعض الصحف من اتهام عار عن الصحة لرابطة طلبة الطب الكويتية بمخالفتها لقانون منع الإختلاط ، و جاءت تلك الدعوات بعد أن اقامت الرابطة ندوة للدكتور أحمد الخطيب بعنوان ( تاريخ الحركة السياسية) ضمن فعاليات أسبوعها السياسي ، و قد كان هذا الإتهام عار من الصحة استنادا لقانون منع الإختلاط الذي ينص على ضرورة تخصيص أماكن خاصة للطالبات في قاعات الدرس و الأنشطة و غيرها كما ورد ذكره في نص قانون ٢٤\١٩٩٦ المرفق مع البيان كما قمنا بتخصيص مدخل منفصل للطلبة و الطالبات. ،
و اننا اذ نؤكد بأن الرابطة قد التزمت اشد الإلتزام بالقانون بحيث تم تخصيص أماكن للطالبات في القاعة التي عقدت فيها الندوة فإننا نستغرب قرار عميد شؤن الطلبة بتشكيل لجنة تحقيق معنا على الرغم من أن هذا النوع من الأنشطة يقام باستمرار في جميع الجمعيات و الروابط في كليات جامعة الكويت الأخرى و قد لحق بنشاطنا عدة أنشطة مماثلة اقامتها تلك الجمعيات لا تتعارض و القانون كما كان نشاطنا كما قامت أحد الجمعيات بعقد ندوة دون تخصيص أماكن للطالبات و هو ما يعتبر مخالفة للقانون و لكنها لم تحول إلى التحقيق و لم تحرك العمادة ساكنا في هذا الإطار على عكس ما حدث معنا فهل هذه الممارسات هي إستمرار لسياسة الكيل بمكيالين التي تعودت عمادة شؤون الطلبة على انتهاجها في وجهنا ولمصلحة من تقوم العمادة بهذا الدور الإستثنائي ؟ .
و ما اثار حفيظتنا هو تخطي العمادة لنا و عدم توجيه كتاب تشكيل لجنة التحقيق إلينا فهل من
الصواب أن نعرف عن ملابسات لجنة التحقيق و أعضاؤها من الصحف ، و نحن المعنين بالموضوع أولا و أخيرا
في ختام هذا البيان نهيب بالإدارة الجامعية بأن تحرك ساكنا تجاه التمييز الحاصل مع بعض الروابط الطلابية و نؤكد بأننا ننتظر ما ستؤول إليه لجنة التحقيق متمنين أن لا تأتي النتيجة مخيبة للأمال و استمرارا لمسرحية استهدافنا الهزيلة، هذا و نهيب بالجموع الطلابية بالوقوف خلف رابطتهم ممثلهم الشرعي لوضع حد لمثل هذه التجاوزات و الإتهامات الغير المسؤولة التي لم و لن تنال من سمعة طلبة و طالبات كلية الطب التي تعتبر أرقى صرح أكاديمي في جامعة الكويت .


إخوانكم في رابطة طلبة الطب الكويتية

*****

Thank God ,, I was there :)

و ماني قايل شي بس بحطلكم صورتين من الي انا مصورهم :)

من بعد سالفة رابطة المستقلة الحين سالفة رابطة الطب ,, يا جماعة الخير يالي اسمكم العمادة لكم حل من حلين

يا تصيرون موظفين بعقود عمل و كفالتكم عالإئتلافية

يا انكم تقلبون عمادتكم إلى شركة دجاج بياض

و أنا أنصحكم بالثاني و انتوا مخيرين و لقد خيرتكم فاختاروا ;Pp

GOD , THIS UNIVERSITY IS FULL OF BULLSHIT :(

داشين بالـ 32 !

عند التفتيش

و انا قاعد اطلع الاجازة و الدفتر لفت انتباهي حوار غريب بين الضابط و واحد مخالف

المخالف يقول حق الضابط شوف اليوم مخالفيني

جان يقوله يا حبيبي هذي 30-11

جان يقوله لا لا شوف احنا اليوم خلصنا 31-1 و داشين بال 32 !!

انا هني ويهي صار عليه مليون علامة تعجب

هل كيف شهر فيه 32 يوم

المهم خلصنا جان اقول حق الضابط

يا الغالي ترى ماكو شهر فيه 32 يوم

جان يقولي لا لا ما عليك انا مفتحله و منتبه له !!

بالله عليكم لو انتوا بموقفي شتسوون !!